दलित किसानलाई थ्रेसर अनुदान

दोलखा । दोलखाको बैतेश्वर गाउँपालिकाले दलित समुदायका किसानलाई यान्त्रीकरणतर्फ आकर्षित गर्न तथा कम लगानीमा बढी आम्दानी लिने उद्देश्यले दलित समुदायका किसानलाई १४ वटा थ्रेसर अनुदानमा वितरण गरेको छ ।

गाउँपालिकाको कृषि शाखाअन्तर्गतको स्वीकृत वार्षिक कार्यक्रमअन्तर्गत पालिकाभित्रका आठवटा वडाका दलित समुदायका किसानहरूले संयुक्तरूपमा प्रयोग गर्नेगरी ९० प्रतिशत अनुदानमा १४ वटा थ्रेसर वितरण गरेको बैतेश्वर गाउँपालिकाका अध्यक्ष छबि लामाले बताए । धान, गहुँ र कोदो चुट्न मिल्ने मल्टी क्रस थ्रेसर उपकरण वडा नम्बर १ देखि ८ सम्मका दलित किसानलाई वितरण गरिएको हो ।

किसानलाई कृषि पेसातर्फ आकर्षित गर्न, कृषिमा आधुनिकीकरण तथा यान्त्रीकरणतर्फ अघि बढाउन, कम लगानीमा धेरै आम्दानी र कम समयमा धेरै काम सहजै गर्नको लागि सहयोग पु¥याउने उद्देश्यले थ्रेसर वितरण गरिएको बैतेश्वर गाउँपालिका कृषि शाखाप्रमुख लक्ष्मी आचार्यले बताइन् ।

बैतेश्वर गाउँपालिकाले किसानको लागि बजेटमा प्रथामिकता दिँदै कार्यक्रमलाई सञ्चालन गर्दै आएकाले आगामी वर्ष पनि कृषिलाई प्रथामिकता दिएर बजेट तर्जुमा गर्ने प्रतिबद्धता पालिकाको छ । यसअघि पनि गाउँपालिकाले किसानहरूलाई विभिन्न अनुदान वितरण गरिसकेको छ । थ्रेसर आवश्यक भयो भन्दै धेरै दलित किसानहरूको निवेदन आएपछि पालिकाले सूचना निकालेर थ्रेसर वितरण गरेको कृषि प्राविधिक निरोज पाण्डे बताए ।