कृषिलाई ‘फ्री जोन’ घोषणा गर्न ‘फोर एच’ नेपालको माग

काठमाडौं, वैशाख २१
फोर एच नेपालले कृषि क्षेत्रलाई फ्री जोन घोषणा गर्न माग गरेको छ । कोरानाले नेपालको कृषि अर्थतन्त्रमा नकारात्मक प्रभाव पारेकाले तत्काल सरकारले कृषि राहत प्याकेज घोषणा गर्नुपर्नेमा फोर एच नेपालले जोड दिएको छ । फोर एच नेपालले एक विज्ञप्ति जारी गर्दै सरकारलाई नौ बुँदे सुझावसमेत दिएको छ । फोर एच नेपालले किसानलाई कोरोनाको कारण मल तथा बीउ खरिद गर्न र कृषि कार्य गर्न कठिनाइ भएकोले तत्काल किसानका लागि एकीकृत कृषि पासको व्यवस्था गर्न नेपाल सरकारसँग मागसमेत गरेको छ ।

कृषि उत्पादन घटेमा भोकमारी हुने र खाद्य संकट निम्तिने भन्दै सबै कृषिवाली तथा पुशुपञ्छी व्यवसायको शत प्रतिशत बीमा गर्न र उत्पादनलाई नेपाल सरकार आफैले खरिद गरी भण्डारण गर्न फोर एचले आग्रह गरेको छ । कोरोनाबाट किसानलाई सुरक्षित गर्न कृषि स्वास्थ्य क्लिनिकको स्थापनासँगै किसान तथा कृषि मजदुरको खेतबारी तथा कार्यस्थलमै नियमित स्वास्थ्य चेकजाँच गरिनुपर्ने उक्त विज्ञप्तिमा उल्लेख गरेको छ ।

कृषिजन्यवस्तु तथा खाद्यन्न ढुवानीमा राहतको माग गर्दै संलग्न मजुदर तथा कामदारलाई पीपीई उपलब्ध नगराएकोले कोरोनाको जोखिम बढदै गएकोमा फोर एचले चिन्ता व्यक्त गरेको छ । साथै, फोर एचले कृषि ऋणमा सहुलियत दिई ब्याज छुट दिन, बेरोजगारलाई कृषि क्षेत्रमा परिचालन गरी मजदुरलाई उचित ज्याला दिन र युवालाई कृषिमा सहभागी गराउन नयाँ आकर्षक कार्यक्रम ल्याउन फोर एचले सरकारसंग आग्रह गरेको छ ।

नेपालमा कृषिमा आधारित ग्रामीण अर्थतन्त्रभएको उचित समयमा प्रभावकारी कदम नचाले कोभिड–१९ पछि समग्र अर्थतन्त्रमा नकारात्मक प्रभाव परी भोकमारीको ठूलो संकट निम्त्याउने फोर एचले ठहर गरेको छ । अहिले नेपालमा अन्नबाली भित्र्याउने तथा मल–बीउ राख्ने समय भएकाले सरकार यथासक्य प्रभावकारी कदम चाल्न सके यसले केही मात्रामा भए पनि कृषिमा राहत हुने फोर एचको भनाइ छ ।