Techie IT
आजको आर्थिक दैनिक

Aarthik Dainik

An Economic Newsportal

गृहपृष्ठप्रदेश समाचारहिजोआज चैते धान भित्र्याउने चटारो

हिजोआज चैते धान भित्र्याउने चटारो


घोडाघोडी (कैलाली) । हिजोआज कैलालीको घोडाघोडी नगरपालिका–८ का बुझाउन चौधरीलाई चैते धान भित्र्याउने चटारो छ । उनले पाँच कठ्ठा जमिनमा चैते धान लगाएका छन् । बर्खे धानभन्दा चैते धान बढी उब्जनी भएको उनले बताए ।चौधरीले तीन वर्षदेखि चैते धानको खेती गर्दैआएका छन् ।

चैते धान लगाएको सुरुको वर्ष पाँच कठ्ठामा १० क्विन्टल उत्पादन भएको उनले बताए । बर्खे धान सो जग्गामा ६ क्विन्टल उत्पादन भएको थियो । खानमा मिठो र उत्पादन बढी हुने भएकाले चैते धान खेतीतर्फ आकर्षित भएको चौधरीको भनाइ छ । “अर्को वर्ष एक बिघामा चैते धान लगाउने सोच छ”, चौधरीले भने ।

कतिपय किसानले चैते धान भित्र्याइसकेका छन् । कोही भित्र्याउने तयारीमा छन । चौधरीले जस्तै घोडाघोडी नगरपालिकाका ९० किसानले पाँच सय २१ कट्ठामा यस वर्ष चैते धान लगाएका छन् । किसानलाई प्रोत्साहन गर्न घोडाघोडी नगरपालिकाले चैते धान खेती गर्नेलाई पुरस्कृत गर्दैआएको छ । कृषि शाखा प्रमुख जनकसिंह धामीले पालिकाभित्रका चैते धान रोप्ने ९० किसानलाई प्रतिकट्ठा पाँच सयका दरले पुरस्कृत गरिएको जानकारी दिए ।

पछिल्लो समय जमिन बाँझो राख्ने क्रम बढेको र स्थानीय रुपमै उत्पादन गर्न सकिने खाद्यान्नको समेत आयात बढ्दै जान थालेकाले किसानलाई प्रोत्साहित गरी उत्पादनमा जोड दिइएको उनले बताए । घोडाघोडीसँगै कैलालीका अन्य पालिकाका किसान पनि चैते धान खेतीतर्फ आकर्षित भएका छन् । बर्सेनि बाढीका कारण बर्खे धान भित्र्याउन नपाएपछि सो क्षेत्रका बासिन्दा चैते धान लगाउन थालेका हुन् ।

कृषि ज्ञान केन्द्र कैलालीका प्रमुख खगेन्द्र शर्माले पछिल्लो समय कैलालीका किसान चैते धान खेतीतर्फ आकर्षित हुुँदै गएको जानकारी दिए । उनका अनुसार भजनी र टीकापुर नगरपालिकाका साथै जोशीपुर र कैलारी गाउँपालिकामा विगतदेखि नै चैते धान खेती लगाउने गरिएको छ । यी क्षेत्रमा वर्षातमा डुबान हुने भएकाले चैते धान लगाइन्छ । पछिल्ला वर्षहरुमा जिल्लाको घोडाघोडी, लम्किचुहा नगरपालिका र धनगढी उपमहानगरपालिकामा पनि चैते धान खेतीलगाउने किसानको सङ्ख्या बढ्दै गएको प्रमुख शर्माले बताए । डुबान हुुने क्षेत्रमा एक बाली मात्रै धान भित्र्याउने गरिन्छ । अन्य क्षेत्रमा चैते र बर्खे गरेर दुई बाली भित्र्याइने गरेको उनले बताए ।

प्रमुख शर्माले चैते धान लगाउँदा जिल्लाको धान उत्पादनमा वृद्धि भएको बताए । उनका अनुसार कैलाली जिल्लाभर गत वर्ष एक हजार एक सय हेक्टरमा चैते धान लगाइएको थियो । यसवर्ष एक हजार एक सय ५० हेक्टरमा चैते धान लगाइएको छ । प्रमुख शर्माले चैते धान प्रति हेक्टर औषतमा पाँच टनका हिसाबले उत्पादन हुने  बताए । गत वर्ष पाँच हजार पाँच सय टन धान उत्पादन भएकामा यसवर्ष पाँच हजार सात सय ५० टन धान उत्पादन हुने अनुमान गरिएको छ ।

चैते धान खुला आकाशमुनी पर्याप्त सूर्यको प्रकाश पाउने भएकाले उत्पादन पनि बढी हुने प्रमुख शर्माले बताए । चैते धान खेतीका लागि सङ्घीय र प्रदेश सरकारका साथै स्थानीय तहले पनि विभिन्न कार्यक्रम ल्याएको छ । “यसमा रोग कीराको प्रकोपसमेत कम हुन्छ ।”


क्याटेगोरी : प्रदेश समाचार, सुदूरपश्चिम प्रदेश, सहकारी–कृषि

तपाईको प्रतिक्रिया

guest
0 Comments
Inline Feedbacks
View all comments

0
Would love your thoughts, please comment.x
()
x