किसानको श्रमको मूल्य उठ्ने गरी मूल्य निर्धारण गर्न आग्रह

काठमाडौं ।
कृषि तथा पशुपंक्षी विकासमन्त्री पद्माकुमारी अर्यालले किसानको श्रमको मूल्य उठ्ने गरी किसानले उत्पादन गरेको वस्तुको मूल्य निर्धारण गर्न कालिमाटी फलफूल तथा तरकारी बजार विकास समितिलाई आग्रह गरेकी छिन् । शनिबार समितिको २७औं वार्षिकोत्सव समारोहमा उनले किसानले उत्पादनको उचित मूल्य पाउन नसकेको बताइन् ।

किसानबाट उपभोक्तासम्म कृषि उत्पादन आइपुग्दासम्म मूल्य धेरै चुलिएको अवस्था हुने गरेको भन्दै उनले यो असन्तुलनलाई अन्त्य गर्न आग्रह गरिन् । ‘किसानलाई न्यून मूल्य दिने र उपभोक्तासम्म आइपुग्दा उच्च मूल्य हुने भएपछी बीचको धेरै नाफा लिइदिनुभएन’, उनले भनिन्, ‘उपभोक्ता पनि मारमा पर्नु भएन र उत्पादन गर्ने किसान पनि मर्कामा पर्नुभएन ।

किसान, उपभोक्ता र व्यवसायी सबैलाई ठीक हुनेगरी बजार मूल्य निर्धारण हुनुप-यो ।’ उत्पादन र बजारलाई सँगै लैजानुपर्ने भन्दै उनले यो काम गर्न सरकार, निजी क्षेत्र र सहकारी क्षेत्र सँगसँगै जानुपर्ने बताइन् । बजारलाई सबल बनाउन बजार विस्तार गर्नुपर्ने आवश्यकता रहेको पनि उनले बताइन् । त्यसका लागि सरकारले संघीय, प्रादेशिक र स्थानीय बजार गरी तीन खालको बजारको परिकल्पना गरेको उनको भनाइ थियो । नौवटा ठूला बजार स्थापना गर्नका लागि सरकारले प्रक्रिया अगाडि बढाइसकेको भन्दै उनले बजारविना उत्पादनको अर्थ नहुने भएकाले किसानले उत्पादन गरेको वस्तु उपभोक्तासम्म सहज ढंगले पु-याउन बजारको व्यवस्था आवश्यक रहेको बताइन् ।

कालीमाटी फलफूल तथा तरकारी बजार व्यवस्थापन समितिले केही सुधार गरेको देखिए पनि व्यवहारतः अझ धेरै सुधार गर्नुपर्ने आवश्यकता रहेको उनले औँल्याइन् । फोहोर र पार्किङको उचित व्यवस्थापन गर्न सुझाव दिँदै उनले स्टलसँग जोडिएका केही कुराले बेथिति ल्याएकोले सुशासन कायम गर्नका लागि सहयोगी बनिदिन व्यवसायीहरुलाई आग्रह गरिन् ।