Techie IT
×
गृहपृष्ठसहकारी–कृषिकिसानलाई तत्काल कोरोनाविरुद्धको खोप उपलब्ध गराउन फोर एच नेपालको माग

किसानलाई तत्काल कोरोनाविरुद्धको खोप उपलब्ध गराउन फोर एच नेपालको माग


काठमाडौं ।
फोर एच नेपालले एक वक्तव्य जारी गरी किसानलाई तत्काल कोरानाविरुद्धको खोप उपलब्ध गराउन माग गरेको छ । साथै किसानलाई फ्रन्टलाइन वर्कर तथा कृषिलाई उच्च जोखिमयुक्त क्षेत्र घोषणा गर्न पनि सरकारसँग माग गरिएको छ ।

फोर एच नेपालका अध्यक्ष लोकराज अवस्थीद्वारा जारी गरिएको विज्ञप्तिमा किसानलाई मल र बीउ खरिद गर्न तथा कृषिजन्य सामग्री बजारसम्म पु-याउन कठिनाइ भएकाले किसानका लागि स्थानीय तहबाटै पासको व्यवस्था गर्न भनिएको छ । साथै सुदूरपश्चिमका पहाडी जिल्लाहरूमा असिनापानी तथा खराब मौसमको कारण उत्पादनमा कमी आएको भन्दै तत्काल खाद्यान्न उपलब्ध गराउन तथा किसानलाई उचित क्षतिपूर्ति उपलब्ध गराउनका माग गरिएको छ ।

विगत वर्षजस्तै यो वर्ष पनि मलको समस्या देखिनसक्ने भन्दै तत्काल किसानलाई मल उपलब्ध गराउने व्यवस्था मिलाउनुपर्ने विज्ञप्तिमा उल्लेख छ । साथै, किसानले लिएको कृषि ऋणलाई सहुलियत दिन र ब्याज तिर्ने समयसीमा बढाउन पनि माग गरिएको छ । यस्तै आगामी वर्षको नीति तथा कार्यक्रममा किसानका लागि विशेष व्यवस्था गर्न तीनै तहका सरकारसँग जोडदार माग गरिएको छ ।

कोभिड १९ को दोस्रो भेरियन्टले महामारीको रूप लिएसँगै नेपाल सरकारले गरेको लकडाउनको कारण कृषि व्यवसाय तथा किसानहरूले ठूलो समस्या झेल्दै आइरहेका र कृषि उत्पादन, बजारीकरण तथा उद्यमशीलतामा दिनानुदिन थप नयाँ समस्या तथा चुनौतीहरू थपिँदै गइरहेको फोर एच नेपालको ठहर रहेको विज्ञप्तिमा उल्लेख गरिएको छ । 


क्याटेगोरी : सहकारी–कृषि

तपाईको प्रतिक्रिया