बारामा १५ हजार ५ सय १० हेक्टरमा चैते धानखेती

कलैया । बारामा आर्थिक वर्ष २०७८/०७९ मा कृषकले कूल १५ हजार पाँच सय १० हेक्टर क्षेत्रफलमा विभिन्न जातको चैते धानखेती गरेको कृषि ज्ञान केन्द्रले जनाएको छ । भदैया, अगहनी धानको उत्पादकत्वभन्दा बढी उत्पादन दिने भएको हुनाले कृषकले आफ्नो साधन स्रोतबाट सिँचाइको राम्रो व्यवस्था गरेका कारण चैते धानखेतीतर्फ कृषक आर्कषित भई प्रत्येक वर्ष चैते धानको खेती दिनप्रति वृद्धि हुँदै गएको ज्ञानकेन्द्रका प्रमुख जीतेन्द्र यादवले जानकारी दिए ।

आर्थिक वर्ष २०७७/०७८ मा कृषकले कुल १२ हजार एक सय १५ हेक्टर क्षेत्रफलमा चैते धानखेती गरिएको थियो । गत साल भदैया धान प्रतिहेक्टर चार दशमलव तीन मेट्रिकटन, अगहनी धान चार दशमलव १५ मेट्रिकटनका दरले उत्पादन भएको थियो ।

यस वर्ष कृषकले हर्दिनाथ १, चैते १, २, र चैते ४ जातको धानखेती गरी १५ हजार पाँच सय १० हेक्टर क्षेत्रफलमा खेती गरिएको कृषि ज्ञानकेन्द्रका कृषिविज्ञ राजकरण चौरसियाले जानकारी दिए । चैते धान प्रतिहेक्टर चार दशमलव ६३ मेट्रिकटनले दरले ६९ हजार नौ सय ७२ मेट्रिक टन धान उत्पादन भएको केन्द्रले जनाएको छ ।