कान्तिपुर सहकारीमा बचतकर्ताको धर्ना

काठमाडौं,काठमाडौंको तीनकुनेमा रहेको कान्तिपुर बचत तथा ऋण सहकारी संस्था लिमिटेडले आफने बचत फिर्ता नगरेपछि बचतकर्ताहरुले कार्यालयमा नै धर्ना दिएका छन् ।

कान्तिपुर अस्पतालका अध्यक्ष तथा सहकारीका तत्कालीन अध्यक्ष चन्द्र बहादुर लामाले रकम हिनामिना गरेको बताउँदै बचतकर्ताहरुले अहिलेका सञ्चालकहरुले पैसा फिर्ता दिन नसकेर छलफलमा बोलाएर आफैँ उपस्थित नभएपछि कार्यालयमा नै धर्ना दिएका हुन् ।

कान्तिपुर सहकारीका अहिलेका अध्यक्ष हिमालय विक्रम मल्ल ठकुरीले शनिबार बचतकर्ताहरुलाई वार्ताका लागि बोलाए पनि उनी आफैँ बैठकमा उपस्थित नभएसँगै सहकारीमा धर्ना दिएका हुन् । दुःख गरेर कमाएको रकम सहकारीले फिर्ता दिन्छु भन्दै नदिएर सहकारीले पटक–पटक धोका दिएपछि बचतकर्ताहरु हैरान बनेका छन् ।

सहकारीको रकम तत्कालीन अध्यक्ष सीबी (चन्द्र बहादुर) लामाले हिनामिना गरेर सहकारी आर्थिक संकटमा परेको आरोप लागे पनि लामाले अहिलेसम्म सहकारीमा आफू हुँदा गरेको लगानीको पारदर्शिता नदेखाएको बचतकर्ताहरुले बताउँदै आएका छन् । लामाले आफ्नो तथा आफ्ना नजिकका आफन्तहरुको नाममा होटल रेष्टुरेण्टदेखि लिएर घरजग्गा तथा राजनीतिक दललाई समेत चुनावमा टिकट पाउने शर्तमा सहकारीको पैसा लगानी गरेको आरोप लाग्दै आएको छ ।