एक सय १५ जना जेष्ठ नागरिक सम्मानित

भक्तपुर । सिद्धि गणेश वचत तथा श्रृण सहकारी संस्था लिमिटेडले भक्तपुरका एक सय १५ जना जेष्ठ नागरिकहरुलाई सम्मान गरेको छ । संस्थाले सोमबार आयोजना गरेको सम्मान कार्यक्रममा नेपाल मजदुर किसान पार्टीका अध्यक्ष नारायणमान विजुक्छेंले जेष्ठ नागरिकहरुलाई दोसल्ला ओढाई सम्मान गरेका हुन् ।

संस्थाले प्रत्येक वर्ष संस्थाका सदस्य ७० वर्ष नाघेका बृद्धबृद्धाहरुलाई सम्मान गर्दै आएको छ । संस्थाले २०६९ सालबाट जेष्ठ नागरिक सम्मान कार्यक्रम गर्न थालेको जनाएको छ । हालसम्म ७ सय ८६ जना जेष्ठ नागरिकलाई सम्मान गरिसकेको कार्यक्रममा जानकारी दिईएको थियो । संस्थाले ६० वर्षमाथिका व्यक्तिहरुलाई जेष्ठ नागरिकको मान्यता दिएको छ । तर पनि सम्मान भने ७० वर्षमाथिकालाई मात्रै गर्दै आएको छ । हाल संस्थामा पाँंच सय ९७ जना जेष्ठ नागरिकहरु सदस्य रहेका छन् । उनीहरुबाट ४२ करोड ८० लाख रुपैयाँं बचत भएको जनाइएको छ । संस्था भक्तपुरकै सवैभन्दा ठूलो सहरकारी संस्था हो । यसमा कुल १६ हजार दुई सय १० सदस्य रहेका छन् ।