४९ हजारको परीक्षण १२ जना घर फर्किए

काठमाडौं,बैशाख १४

सरकारले पछिल्लो समयमा कोरोना परीक्षणलाई तीव्रता दिएको छ । शनिबारसम्म कुल ४९ हजार ३ सय ३६ बराबरको परीक्षण गरिएको छ । स्वास्थ्य तथा जनसङ्ख्या मन्त्रालयमा शनिबार आयोजित पत्रकार सम्मेलनमा दिइएको जानकारीअनुसार पीसीआर परीक्षण सङ्ख्या नौ हजार ६ सय ६६ रहेको छ भने ¥यापिड डायग्नोस्टिक टेस्ट प्रविधिबाट गरिएको परीक्षण ३९ हजार ६७० पुगेको छ ।

त्यस आधारमा कुल परीक्षण ४९ हजार ३ सय ३६ पुगेको हो । यस्तै पछिल्लो २४ घण्टामा मात्रै थप एक हजार ९ सय ४५ नमूना परीक्षण गरिएको छ । स्वास्थ्य तथा जनसङ्ख्या मन्त्रालयका प्रवक्ता डा. विकास देवकोटाका अनुसार प्रदेश नं १ मा कुल चार हजार १ सय ६० परीक्षण गरिएको छ । प्रदेश नं २ मा कुल पाँच हजार ४४, वाग्मती प्रदेशमा कुल सात हजार ४ सय ६७ परीक्षण गरिएको छ । त्यस्तै गण्डकी प्रदेशमा कुल चार हजार ८ सय ७१, प्रदेश नं ५ मा दुई हजार ९ सय ५०, कर्णाली प्रदेशमा चार हजार ९ सय ७४ र सुदूरपश्चिम प्रदेशमा कुल १० हजार २०४ नमूना परीक्षण गरिएको छ ।

हालसम्म कुल १४ हजार ७ सय ३१ जना क्वारेन्टाइनमा रहेका छन् । यस्तै कुल ८७ जना आइसोलेसनमा रहेका छन् । तीमध्ये काठमाडौँमा तीन र बाहिर ८४ रहेका छन् । पछिल्लो २४ घण्टामा मन्त्रालयले स्थापना गरेको कल सेन्टरमा कुल एक हजार ९ सय जनाले फोन सम्पर्क गरेका थिए । उक्त फोन सम्पर्कलाई सम्बन्धित चिकित्सकले आवश्यक समाधान गरेको प्रवक्ता डा. देवकोटाले जानकारी दिए ।

हालसम्म मन्त्रालयले सञ्चालनमा ल्याएको मोबाइल एपमा कुल २५ हजार ९ सय ६ जनाले मूल्याङ्कन फाराम भरेकामा तीन जनाको अवस्था जोखिमपूर्ण देखिएकाले टे«सिङ गर्ने कार्य जारी रहेको छ । हालसम्म कुल रेड जोनमा भने २ सय ९० जना रहेका छन् । शुक्रबार साँझ झापाको दमकका एक ६५ वर्षीय पुरुषमा कोरोना पोजेटिभ फेला परेको थियो । गत चैत ४ गते दुवईबाट नेपाल आएका ती पुरुषको छोरासहितको परीक्षण गर्दा ६५ वर्षीय पुरुषमा कोरोनाको सङ्क्रमण देखिएको थियो ।

यस्तै धौलागिरि अस्पतालले शुक्रबार साँझ नै एक कोरोना सङ्क्रमित युवतीलाई घर पठाइएको थियो भने भरतपुरमा उपचाररत २७ वर्षीय पुरुषको पनि घर पठाउने तयारी गरिएको छ । हालसम्म देशभर कुल ४९ जना कोरोना सङ्क्रमित देखिएकामा १२ निको भएर घर फर्किसकेका छन् । हाल धनगढीमा एक, वीरगञ्जमा पाँच भरतपुरमा एक विराटनगरमा ३० जना कोरोना सङ्क्रमितको उपचार भइरहेको छ । उपचारमा रहेकाको स्वास्थ्य अवस्था सामान्य रहेको प्रवक्ता डा. देवकोटाले जानकारी दिए ।

सो अवसरमा गर्मी बढ्दै गएको अवस्थामा औलो रोगको जोखिम बढ्न जाने अवस्था रहेकाले त्यसबाट पनि सुरक्षित रहनसमेत मन्त्रालयले आम जनसमुदायमा आग्रह गरेको छ । आज संसारभर नै विश्व औलो दिवस मनाइएको छ । यस वर्षको औलो दिवसको नारा ‘आफैँबाट सुरु गरौँ, औलोलाई शून्य बनाऔँ’ रहेको छ । संसारभर नै प्रतिदुई मिनेटमा औलाका कारण एक जनाको ज्यान जाने गरेको छ । लामखुट्टेको टोकाइबाट औलो सर्ने भएकाले घर वरपर विशेष स्वास्थ्य सफाइ गर्नसमेत सो अवसरमा प्रवक्ता डा. देवकोटाले आग्रह गरे ।

नेपालले सन् २०२५ सम्म औलो पूर्णरुपमा उन्मूलन गर्ने लक्ष्य राखेको उनको भनाइ छ । ‘गर्मीयाम सुरु भएकाले क्वारेन्टाइनमा रहेकाको समेत औलोको परीक्षण गरिएको छ, औलोको जोखिमबाट आफू पनि बचाँै र अरुलाई पनि बचाऔँ’, प्रवक्ता डा. देवकोटाले भने । औलोबाट विशेष गरी गर्भवती महिला र बच्चालाई जोगाउनुपर्ने जानकारी दिँदै उनले कोभिड–१९ बाट जोगिँदै गर्दा औलोको पनि जोखिम बढ्न सक्ने भएकाले त्यसमा विशेष ध्यान दिन आग्रह गरे ।

पत्रकार सम्मेलनमा परोपकार प्रसूति तथा स्त्रीरोग अस्पतालका निर्देशक डा. जागेश्वर गौतमले लकडाउनको समयमा घरमै रहँदा गर्भवती महिलाले स्वास्थ्यमा विशेष ध्यान दिन आग्रह गरे । उनले स्यानिटाइजर तथा हात साबुनपानीले हात धुन, सकभर भीडभाडमा नजान, चिकित्सकले दिएको औषधि नियमित सेवन गर्नसमेत आग्रह गरे ।

उनले ठूलो समस्या नपरी अस्पताल नजान आग्रह गर्दै ज्वरो आए, प्रेसर बढ्यो शरीर सुन्निएको अवस्थामा भने परोपकार प्रसूति तथा स्त्रीरोग अस्पताल आउनसमेत आग्रह गरे । गर्भवती महिलालाई केन्द्रित गरेर नै अस्पतालले सेवा दिएको उल्लेख गर्दै उनले कोभिड– १९ भएका गर्भवती महिलालाई समेत आवश्यक सेवा दिने गरी शय्या तयार गरिएको र चिकित्सकको समेत व्यवस्था गरिएको जानकारी दिए ।

क्याटेगोरी : समाचार