कोरोनाको कारण वैदेशिक सहयोगका सडक निर्माण अलपत्र
काठमाडौं, असार २१
कोरोना भाइरस कोभिड–१९ को कारण नेपालमा वैदेशिक सहयोगमा सञ्चालित अधिकांश सडक आयोजनाहरु अलपत्र परेका छन् । कोभिड–१९ कै कारण देखाएर पछिल्लो समयमा नेपालकै पुरानोमध्येको एक सडक काठमाडौं–त्रिशूलीको रानीपौवा–पिपलटार खण्डको ३४ किलोमिटर सडकको ठेक्का तोडिएको सार्वजनिक भएको छ । उक्त सडक भारतीय एक्जिम बैंकको सहयोगमा निर्माण हुँदै गरेको थियो । ठेकेदारले एकलौटी ठेक्का तोडेपछि सरकारले पनि तोडेको हो ।
ठेक्का तोड्ने एक भारतीयसहित दुई नेपाली निर्माण कम्पनीलाई कालोसूचीमा राख्ने तयारी सुरु भएको छ । त्यसो त उक्त सडकको पहिलो खण्ड बालाजु–रानीपौवा खण्ड पनि ठेकेदारकै कारण अलपत्र छ । एक जना नेपाली ठेकेदार नेकपाका अध्यक्ष प्रचण्डका घरधनी शारदा प्रसाद अधिकारीको कारण सरकारले चाहेर पनि ठेक्का तोडिन सकेको छैन ।
कोरोनाकै कारण नागढुङ्गास्थित नेपालको पहिलो सुरुङमार्ग निर्माणको काम अघि बढ्नसकेको छैन । कोभिड–१९ नियन्त्रणका लागि सरकारले जारी राखेको बन्दाबन्दीमा सुरुङमार्ग निर्माण ठप्प भएको हो । काठमाडौंमा लकडाउन खुकुलो भए पनि अझै पनि उक्त सुरुङमार्गको काम सुरु भएको छैन । सो आयोजनाको निर्माण सुरु भएको केही दिनमा नै बन्दाबन्दी कारण यहाँ कार्यरत विदेशी र नेपाली सबै फर्किएपछि निर्माणको काम ठप्प भयो । निर्माण कम्पनीले आवश्यक सबै सामग्री निर्माणस्थलमा ल्याए पनि जनशक्तिका अभावमा काम हुनसकेको छैन ।
नेपाल सरकारले ४२ महिनामा निर्माण सक्ने गरी जापानको हाज्मा आङ्लो कर्पाेरेसनलाई निर्माणको जिम्मेवारी दिएको छ । सो सुरुङमार्गमा जापान सरकारको ऋण सहयोग रहेको छ । यस्तै, वैदेशिक लगानी र निर्माणको जिम्मेवारी विदेशी कम्पनीलाई नै दिइएको योजनामा कम्पनीका अधिकांश कर्मचारी आआफ्नो देश फर्किएकाले पनि निर्माण ठप्प बनेको छ ।
सरकारले तत्काल अन्तर्राष्ट्रिय उडान खुलाउने अवस्था नभएकाले आफ्नो देश फर्किएकाहरु नेपाल आउने सम्भावना कम छ । काठमाडौं त्रिशूली सडक, नागढुङ्गा सुरुङमार्ग, नौबिसे–नागढुङ्गा सडक विस्तार, काठमाडौँ चक्रपथ सडक विस्तार, स्याफ्रुबेंसी सडकलगायतका योजना लकडाउनको कारण नराम्रोसँग प्रभावित बनेका छन् । सरकारले गत चैत ११ मा बन्दाबन्दी घोषणा गरेसँगै देशभरका अधिकांश सडक योजनासहितका वैदेशिक सडक योजनाको पनि निर्माण रोकिएको थियो । सरकारले अन्तर्राष्ट्रिय उडान बन्द गर्नुपहिले निर्माणस्थलमा रहेका विदेशी आआफ्नो देश फर्किएका छन् ।
चक्रपथको पहिलो खण्डका रुपमा कोटेश्वर–कलङ्की सडक विस्तार गरेको चीन सरकारले दोस्रो खण्ड विस्तारका लागि अध्ययन गरिसकेको छ । पहिलो खण्डमा संरचना हटाउँदै निर्माण अघि बढाउँदा समयभन्दा केही ढिलाइ भएको थियो । दोस्रो खण्डमा भने सरकारले सडक निर्माणस्थल खाली गरेपछि मात्रै निर्माण सुरु गर्ने चिनियाँ पक्षसँग सहमति भएको थियो ।
सरकारले निर्माणस्थल खाली गरेर चिनियाँ पक्षलाई हस्तान्तरण गर्नुभन्दा पहिले नै कोभिड–१९ को त्रासका कारण उनीहरु चीन फर्किएका थिए । जापान सरकारको सहयोगमा निर्माण सुरु भएका र अध्ययन भइरहेका योजना पनि अघि बढेका छैनन् । काठमाडौँ उपत्यकाको सबैभन्दा बढी जाम हुने जडीबुटीमा फ्लाई ओभर वा सुरुङमार्ग निर्माणका लागि जापान सहयोग नियोग (जाइका)ले अध्ययन गरिरहेको थियो । त्यस्तै तीनकुने–सूर्यविनायक सडक विस्तार गरेको जाइकासँग सूर्यविनायक–धुलिखेल सडक विस्तारका लागिसमेत सरकारसँग छलफल भइरहेको छ । काम भने अगाडि बढेको छैन ।
काठमाडौँ भित्रिने मुख्य नाका नागढुङ्गाको सडक चापको समस्या समाधानको उपायका रुपमा अघि बढाइएको नागढुङ्गा सुरुङमार्ग निर्माण पनि अहिले ठप्प छ । जापान सरकारको ‘सफ्ट लोन’मा निर्माणाधीन सो सुरुङमार्ग निर्माण सुरु भएको केही महिनामा नै रोकिएको छ । अहिले पनि थोरै व्यक्ति त्यहाँ कार्यरत रहेका छन् । यस्तै, विश्व बैंकको सहयोगमा नौबिसे–नागढुङ्गा सडक विस्तारका लागि अध्ययन भइसकेको छ ।
क्याटेगोरी : समाचार
ताजा अपडेट
- न्युयोर्कमा ११४औँ अन्तर्राष्ट्रिय महिला श्रमिक दिवस
- ललितपुर महानगरका नगरप्रमुखद्वारा जिपि फाउन्डेशन अमेरीकाको कार्यालयमा विशेष भेटघाट एवं समसामयिक छलफल
- राष्ट्रपतिद्वारा विधेयक प्रमाणीकरण
- टी–२० शृङ्खलाः नेपाल ‘ए’ टोली आयरल्याण्डको ‘ए’ टोलीसँग पराजित
- न्युयोर्कमा ११४औँ अन्तर्राष्ट्रिय महिला श्रमिक दिवस
- बाह्र वर्षमै एसइई परीक्षा दिँदै पर्वतका एक छात्र
- कांग्रेस पुन: सरकारमा जान्छ : महामन्त्री थापा
- मिटर ब्याजका पाँच मुद्दामा मिलापत्र
धेरैले पढेको
- समसामयिक राजनीतिक व्यङ्ग्य
- ढोरपाटन जोड्ने सडक कालोपत्रे गरिँदै
- एक्सेल डेभलपमेन्ट बैंकको ट्राफिक प्रहरीलाई सहयोग
- युनिश शाहीको गीत ‘धारिलो तिर˝ को भ्युज वान मिलियन नाघ्यो
- इन्फिनिटी लघुवित्तको सातै प्रदेशमा तालिम सम्पन्न
- चिया पसल पनि कम्पनी ?
- नेकपा माओवादी केन्द्र कंचनपुर-काठमाडौ सम्पर्क समन्वय समितिको पाचौं भेला सम्पन्न
- नेपाली अमेरिका कलाकार सङ्घमा बसन्ती राई
तपाईको प्रतिक्रिया