शैक्षिक बेरोजगारी कम गर्न पाँच प्रतिशत ब्याजमा २५ लाख रुपैयाँ कर्जा

काठमाडौँ । सरकारले शैक्षिक क्षेत्रमा बढ्दै गएको बेरोजगारीलाई कम गर्नको लागि शैक्षिक प्रमाणपत्र धितो लिएर कर्जा दिने भएको छ । अर्थमन्त्री विष्णुुप्रसाद पौडेलले आगामी आर्थिक वर्ष २०७८÷०७९ को बजेट सार्वजनिक गर्दै आगामी आर्थिक वर्षमा शैक्षिक प्रमाणपत्र धितो लिएर २५ लाख रुपैयाँ कर्जा दिने भएको छ ।

यसको लागि न्यूनतम पाँच प्रतिशत ब्याज लिनसक्ने व्यवस्था कार्यान्वयनमा ल्याउने अर्थमन्त्री पौडेलले जानकारी दिए । सरकारले बढ्दो युवा बेरोजगारीलाई कम गर्नको लागि पनि स्टार्टअप व्यवसायहरुलाई एक प्रतिशत ब्याजदरको सहुलियतपूर्ण कर्जा उपलब्ध गराउने घोषणा गरेको छ । अर्थमन्त्री विष्णु पौडेलले स्टार्टअप (नवउद्यम) हरुलाई बीउपुँजीका लागि एक प्रतिशत ब्याजमा २५ लाख रुपैयाँसम्म कर्जा दिने व्यवस्था कार्यान्वयनमा ल्याउने घोषणा गरेका हुुन् ।

यसको व्यवस्थापनको लागि एकद्वार प्रणाली कार्यान्वयनमा ल्याउने घोषणा समेत अर्थमन्त्री पौडेलले गरेका छन् ।
आगामी आर्थिक वर्षको बजेटमार्फत सरकारले नवउद्यमीहरुलाई वित्तीयरुपमा सघाउनका लागि एक अर्ब रुपैयाँको जोखिम व्यवस्थापन कोष (च्यालेन्ज फन्ड) स्थापना गरी कार्यान्वयनमा ल्याउने घोषणा पनि अर्थमन्त्री पौडेलले गरेका छन् । यसैगरी सरकारले आगामी आर्थिक वर्षको बजेटमार्फत वैकल्पिक शिक्षालाई प्रोत्साहन गर्नको लागि ल्यापटप खरिदमा सहुलियतपूर्ण कर्जा दिने घोषणा गरेको छ ।