वाइडबडी विमान बन्द गराउने योजनामा संलग्न खरेलले राजीनामा दिए
काठमाण्डौँ,माघ ६
नेपाल वायुसेवा निगमले ल्याएका दुईवटा वाइडबडी विमानलाई घाटामा गएको देखाएर विदेशीलाई लिजमा दिने वा बिक्री गर्ने हवाइ माफियाको योजनामा संलग्न निगम सञ्चालक समिति अध्यक्ष मदन खरेलले पदबाट राजीनामा दिनुपरेको छ । अध्यक्ष खरेल र आर्थिक विभाग निर्देशक युवराज अधिकारी निगमको हितभन्दा पनि निगमलाई धराशायी बनाउने प्रयासमा लागेपछि सुरुदेखि नै पर्यटनमन्त्री योगेश भट्टराईले उनीहरुको क्रियाकलापको निगरानी गर्दै आएका थिए । निगमलाई अगाडि बढाउने ठोस कार्ययोजना नबनाई वाइडबडी विमान खरिद गर्न लिइएको ऋणको किस्ता रकम नतिरी अन्य ऋण तिर्न पैसा दिने, वाइडबडी विमानलाई कम यात्रु भएका क्षेत्रमा उडान गराउने, निगमलाई आन्तरिक र बाह्य उडानका लागि थप विमान खरिद गर्न नदिनेलगायतका कार्य गर्न थालेपछि मन्त्री भट्टराईले अध्यक्ष खरेलको राजीनामा मागेका थिए । विभिन्न बहानामा राजीनामा नदिई बसेका खरेललाई मन्त्री भट्टराईले बर्खास्त गर्ने पक्का भएपछि आइतबार अध्यक्ष पदबाट राजीनामा दिएका हुन् । खरेलले राजीनामा दिएको पर्यटन मन्त्रालय स्रोतले जानकारी दिएको छ । आर्थिक वर्ष २०७१÷०७२ को बजेट वक्तव्यमा निगमलाई राष्ट्रिय र अन्तर्राष्ट्रिय आवागमन र पहुँच बढाउने कार्यमा थप संलग्न गराउन पाँच वर्षमा आन्तरिक उडान तर्फ १५ र बाह्य उडानतर्फ सातवटा नयाँ विमान खरिद गर्ने उल्लेख गरिएको थियो । दुईवटा वाइडबडी विमान आए पनि निजी क्षेत्रका हवाइमाफियाले भएका वाइडबडी विमानलाई पनि घाटामा पार्ने र थप विमान नल्याउने व्यक्तिको खोजी गरेका थिए । त्यसमा खरेल नै उपयुक्त पात्र बनेका थिए ।
खरेल हवाइ माफियाको एजेन्टको रुपमा निगम डुबाउने खेलमा लागेको ठहर मन्त्रीले गरेपछि मन्त्री र उनीबीच खटपट सुरु भएको थियो । खरेललाई नहटाउन मन्त्री भट्टराईलाई धेरैतिरबाट दबाब आए पनि दबाबको अगाडि मन्त्री झुकेनन् र खरेललाई राजीनामा गर्न बाध्य पारे । खरेल निगममा भित्रिने दुई दिनअगाडि नै निगमका तत्कालीन कार्यकारी महाप्रबन्धक सुगतरत्न कंसाकारले निगमलाई जापानको राजधानी टोकियोको नारिता विमानस्थलमा उडान अनुमति दिलाएका थिए ।जापान सहमत भएपछि सम्झौता गर्नुपर्ने थियो । खरेल कार्यकारी अध्यक्ष भएर २०७५ भदौ २९ गते निगममा आएपछि सबैभन्दा पहिला नै जापान सम्झौता गर्न जाने टोलीलाई रोकेका थिए । कंसारकाले अनुमति दिलाएको ठाउँमा किन विमान उडाउने भनेर खरेलले त्यसलाई रद्द गरेर विना अध्ययन जापानकै ओसाका उडान गर्ने निर्णय गरेका थिए । खरेलको कारण निगमलाई गत भदौदेखि पुससम्म दश करोड रुपैयाँभन्दा बढी घाटा लागेको छ । उक्त घाटा वाइडबडीको कारणले लागेको भनेर उनले गलत प्रचार गराउने गरेका थिए । वाइडबडी विमान खरिद गर्दा निगमले नारिता उडान गर्ने व्यावसायिक योजना बनाएको थियो ।
सोहीअनुसार सम्झौता गर्न कंसाकारले सञ्चालक समितिबाट सहमति पनि पाएका थिए । तर, खरेलले त्यसलाई रुचाएनन् र निगमलाई फसाए । निगमका अनुसार नारिता विमानस्थल संसारकै व्यस्तमध्ये पर्ने विमानस्थल हो । सो विमानस्थलबाट उडान भर्न अन्य एयरलाइन्सले लामो समय कुर्नुपर्छ । तर, निगमले अनुमति पाएपछि सम्झौता गर्न जाने अघिल्लो दिन खरेलले एकाएक जापान जाने टोलीलाई रोकेका थिए । निगमलाई नारिता उडान भर्न नदिने योजनामा स्वदेश तथा विदेशका हवाइ एजेन्ट लागेका थिए । एजेन्टको योजनामा खरेलले सहीछाप लगाएपछि निगमको उडान लामो समयसम्म रोकियो भने जापानकै ओसाका उडानले निगमलाई करोडौं घाटामा पु¥यायो । आर्थिक रुपमा मात्र होइन प्राविधिक रुपमा पनि नारिता उडानले निगमलाई फाइदा दिने थियो । जापानमा झण्डै ५६ हजार नेपाली छन् । नारिता उडान गर्दा धेरै नेपाली मात्र होइन अन्य विदेशी र जापानी पर्यटकलाई नेपाल आउन सहज हुने थियो । त्यसले निगमलाई आर्थिक रुपमा सबल बनाउने पक्का थियो । तर, खरेलको कारण निगम उठ्नै नसक्ने ऋणमा डुब्न पुगेको छ ।
क्याटेगोरी : समाचार
ताजा अपडेट
- तीन अन्तर्राष्ट्रिय विमानस्थल सञ्चालनको सुझाव दिन गठित समितिले किन दियो निजगढ विमानस्थल बनाउने सुझाव
- के शिक्षामन्त्रीले चाहेर मात्रै दलमा आबद्ध शिक्षकहरूलाई बर्खास्त गर्न सम्भव छ?
- इजरेल र इरानसँग कति हतियार छन्, सैन्य शक्ति कसको बढी छ ?
- एमाले राष्ट्रिय महाधिवेशन प्रतिनिधि परिषद् बैठक
- देशभर पश्चिमी वायु र स्थानीय वायुको आंशिक प्रभाव कायमै
- युएई एसिसी प्रिमियर कपको फाइनलमा, नेपाल छ विकेटले पराजित
- प्रत्येक प्रदेशमा एउटा औद्योगिक क्षेत्र बिस्तारको कार्यक्रम ल्याइने : मन्त्री भण्डारी
- पूर्वमुख्यसचिव शाक्यको राजकीय सम्मानका साथ अन्त्येष्टि
धेरैले पढेको
- समसामयिक राजनीतिक व्यङ्ग्य
- राजेन्द्र विमल र हरिहर शर्मालाई पुरस्कृत गरिने
- ढोरपाटन जोड्ने सडक कालोपत्रे गरिँदै
- युनिश शाहीको गीत ‘धारिलो तिर˝ को भ्युज वान मिलियन नाघ्यो
- एक्सेल डेभलपमेन्ट बैंकको ट्राफिक प्रहरीलाई सहयोग
- चिया पसल पनि कम्पनी ?
- इन्फिनिटी लघुवित्तको सातै प्रदेशमा तालिम सम्पन्न
- नेकपा माओवादी केन्द्र कंचनपुर-काठमाडौ सम्पर्क समन्वय समितिको पाचौं भेला सम्पन्न
तपाईको प्रतिक्रिया