एनसेलद्वारा ३३८ मोबाइल टावर जडान

काठमाडौं । एनसेल आजियाटा लिमिटेडले तीन सय ३८ वटा नयाँ बेस ट्रान्ससिभर स्टेसन (बीटीएस) अर्थात् मोबाइल टावरहरू जडान गरेको छ । कम्पनीले गत आर्थिक वर्ष २०७९/८० मा देशका विभिन्न नयाँ ठाउँमा आफ्नो सेवा विस्तार र गुणस्तरलाई थप सुधार गर्दै सो टावरहरू जडान गरेको हो ।

कम्पनीका अनुसार फोरजी सेवाको पहुँचबाट स्थानीयलाई लाभ प्रदान गर्न पहिलो पटक सेवा विस्तार गरिएका नयाँ स्थानहरूमा हिमाली, पहाडी र तराई भेगका ५५ ग्रामीण तथा दुर्गम ठाउँहरू पर्छन् । पहिलो पटक फोरजी सेवा विस्तार गरिएका नयाँ स्थानहरू उत्तरगया गाउँपालिका (रसुवा), ठाटीकाँध गाउँपालिका (दैलेख), दुर्गाथली गाउँपालिका (बझाङ), जन्तेढुङ्गा गाउँपालिका (खोटाङ) का ग्रामीण इलाका र इनरुवा नगरपालिकाका नयाँ स्थानहरू रहेका छन् । गत आवमा नै एनसेलले आफूले प्रदान गर्दै आएको सेवाको गुणस्तर सुधार र ग्राहकको सेवा अनुभव अभिवृद्धि गर्न २८३ नयाँ टावरहरू जडान गरेको छ । यी टावरहरू सातै प्रदेशका ५० भन्दा बढी जिल्लामा जडान गरिएको थियो । लुम्बिनी प्रदेश, सुदूरपश्चिम प्रदेश, कोशी प्रदेश, मधेश प्रदेशलगायतका स्थानमा अधिकांश साइट जडान भएका छन् ।

एनसेलका प्रमुख कार्यकारी अधिकृत तथा प्रबन्ध निर्देशक जाब्बोर कायुमोभले एनसेलका लागि सबैभन्दा महत्वपूर्ण पक्ष भनेको नेपालभर एउटा राम्रो दूरसञ्चार नेटवर्क निर्माण गर्नु रहेको बताए । सोहीअनुसार कम्पनीले आधारभूत मोबाइल र उच्च गतिको मोबाइल ब्रोडब्यान्ड कनेक्टिभिटीमा पहुँच सुनिश्चित गर्दै देशका विभिन्न भागका दुर्गम र क्षेत्रमा सेवा विस्तार गरेको जानकारी दिए । एनसेलले फोरजी क्षमता अभिवृद्धि गर्दै गत आवमा विभिन्न ६० जिल्लाका झण्डै एक हजार चार सय ५० मोबाइल टावरहरूको स्तरोन्नति पनि गरेको छ । यसरी स्तरोन्नति गरिएका टावहरूमध्ये सात सय ८० भन्दा बढी विभिन्न नगरपालिकामा स्थापना गरिएका टावरहरू रहेको एनसेलले जनाएको छ ।

त्यसैगरी गाउँपालिकास्तरमा जडित चार सय ४० बढी टावरहरूको स्तरोन्नति गरिएको छ । यसबाहेक एनसेलले देशका विभिन्न महानगरपालिका र उप–महानगरपालिकामा रहेका आफ्ना टावरहरूको स्तरोन्नति गर्दै फोरजीको क्षमता अभिवृद्धि गरेको छ । ग्राहकलाई फोरजीअन्तर्गत उच्चगतिको मोबाइल ब्रोडब्याण्ड र भ्वाइस ओभर लङ्ग टर्म इभोलुसन (भोल्टे) सेवामा पहुँच सुनिश्चित गर्न देशभर एनसेलको चार हजारभन्दा बढी फोरजी टावरहरू सञ्चालनमा रहेको बताइएको छ । फोरजी नेटवर्कको विस्तार र क्षमता अभिवृद्धिले मोबाइल ब्रोडब्यान्ड सेवामा पहुँच बढाएर सरकारको डिजिटल नेपाल फ्रेमवर्कको आकांक्षा पूरा गर्न योगदान पु¥याउने कम्पनी भनाइ छ ।