थाई एयरवेजको नेपालमा पुनः उडान

काठमाडौं । थाई एयरवेज इन्टरनेसनलले नेपालमा पुनः उडान सुरू गर्ने भएको छ । कम्पनीले विश्वव्यापी कोभिड–१९ महामारीका कारण अप्रिल २०२० देखि रोकिएको काठमाडौं उडान नोभेम्बरबाट पुनः गर्न लागेको हो ।

नेपालमा उडान पुनः सञ्चालनको लागि थाई एयरवेजले जेनेरल सेल्स एजेन्टको रूपमा सोसाइटी इन्टरनेसनल ट्राभल सरभिसेजलाई नियुक्त गरेको छ । नेपालको बजार व्यवस्थापनको लागि कम्पनीले अगस्ट १, २०२३ बाट नै लागू हुनेगरी सोसाइटी ट्राभललाई सेल्स एजेन्ट नियुक्त गरेको हो । सम्झौताअनुसार सोसाइटी ट्राभलले थाई एयरवेजका लागि सम्पूर्ण ग्राहक र एजेन्ट सपोर्ट सेवासहित चौतर्फी सेल्स, मार्केटिङ र विमानस्थलस्थित सेवाहरू उपलब्ध गराउने छ । यस साझेदारीमार्फत, थाई एयरवेजले कोभिड–१९ का कारण रोकिएको काठमाडौंका लागि उडान पुनः सञ्चालन गर्नेछ । सन् १९६८ को डिसेम्बरमा नेपालका लागि पहिलो पटक थाई एयरवेजले उडान सञ्चालन गरेको थियो ।

थाई एयरवेजका चिफ कमरसियल अफिसर कोराकोट चटासिङ्घाले कम्पनीको काठमाडौं उडान पुनः सञ्चालनमा ल्याउन लागेको बताए । साथै, उनले थाई एयरवेजको उडान पुनः सञ्चालनले दुई देशहरूबीचको आर्थिक गतिविधिहरूलाई समेत अभिवृद्धि गर्ने उल्लेख गरे । अस्ट्रेलिया, जापान, कोरिया, मलेसिया र विश्वका विभिन्न सहरहरूमा थाई एयरवेजको उडान रहेकाले नेपालका यात्रुलाई सहज र सुरक्षित उडान विकल्पहरू प्रदान गर्नुका साथै नेपालको पर्यटन प्रवर्द्धन गर्न सक्षम हुने उनको दाबी थियो । सोसाइटी इन्टरनेसनल ट्राभल सर्भिसेजका अध्यक्ष रविचन्द्र सिंहले थाई एयरवेजले नेपाली जनतालाई ‘भ्याकेसन’ र ‘अन–बोर्ड सर्भिस’ को अवधारणा परिचय गराउनमा महत्वपूर्ण भूमिका खेलेको उनले बताए ।