जेन कन्फरेन्स आयोजना हुने

काठमाडौं । निमा एकेडेमी, एडचेन्ज नेपाल र जियोजेब्रा नेटवर्क अफ नेपालको संयुक्त आयोजनामा जेन कन्फेरेन्स १.० को आयोजना हुने भएको छ ।

राजधानीको ज्ञानेश्वरस्थित हन्च कम्प्लेक्समा आगामी ३ र ४ गते सो सम्मेलन गर्न लागिएको आयोजकले जनाएको छ । यो सम्मेलन, विद्यालयलाई एक्काइसौँ शताब्दीको प्रगतिशील नमुना विद्यालयको रूपमा कसरी विकास गर्न सकिन्छ भन्ने विषयमा केन्द्रित हुने बताइएको छ । सम्मेलनमा एक्काइसौँ शताब्दीका सिप तथा चुनौतीसम्बन्धी छलफल र वर्कसप हुनुका साथै शिक्षालाई युग सुहाउँदो बनाउन विभिन्न सोच तथा शैक्षिक आयाममाथि छलफल हुनेछ । प्रगतिशील विद्यालयको लागि आवश्यक पर्ने नेतृत्व विकास, शिक्षकको पेसागत विकास, आवश्यक शिक्षण प्रविधिको पहिचान सम्मेलनका मुख्य आकर्षण हुन् ।

सम्मेलनको घोषणापत्रमा एक्काइसौँ शताब्दीका लागि चाहिने सिपयुक्त विद्यार्थी तयार पार्न कस्तो रणनीति अपनाउनुपर्छ भन्ने कुरा उल्लेख गरिएको छ । सम्मेलनमा चार वटा विधामा विषय विशेषज्ञबाट प्रस्तुति दिइने छ । सम्बन्धित क्षेत्रका विज्ञले विद्यालयमा प्रोग्रेसिभ नेतृत्व, डिजिटल लर्निङ अभ्यास, पाठ्यव्रmममा नवीनता, शिक्षकको व्यावसायिक विकास, मूल्याङ्कन रणनीतिजस्ता थिममा रहेर आफ्नो ज्ञान तथा अनुभवको प्रस्तुति दिनेछन् ।

यस सम्मेलनमा गणित, कम्प्युटर, विज्ञानलगायत सम्पूर्ण विषय शिक्षकहरूलाई लक्षित हुने गरी वर्कसपको डिजाइन गरिएको छ । एक्काइसौँ शताब्दीका लागि योग्य विद्यार्थी तयार पार्न शिक्षकलाई जेन कन्फेरेन्स उपयोगी हुने विश्वास गरिएको छ । यस सम्मेलनमा विशेषगरी शिक्षा क्षेत्रमा कार्यरत वा रूचि राख्ने जो कोही पनि भाग लिन सक्ने छन् । सम्मेलनमा करिब दुई सय जना सहभागीको अपेक्षा राखिएको आयोजकले जनाएको छ ।