बीवाईडीले निकाल्यो ७० लाख न्यु इनर्जी भेहिकल

काठमाडौं । न्यु इनर्जी भेहिकल र पावर ब्याट्री उत्पादक कम्पनी बीवाईडीले ७० लाख न्यु इनर्जी भेहिकल, डेन्जा एन७ सार्वजनिक गरी यो लक्ष्य हासिल गर्ने पहिलो कम्पनी बनेको छ । कम्पनीको चीनस्थित जिनान फ्याक्ट्रीमा उत्पादित डेन्जा एन७ सार्वजनिक गरेर बीवाईडीले ब्रान्डको लागि सो ऐतिहासिक उपलब्धि हासिल गरेको बताएको छ । बीवाईडी अटोमोटिभ उद्योगमा सन् २००३ मा प्रवेश गरेको थियो र पहिलो न्यु इनर्जी भेहिकल २००८ मा बिक्री गरेको थियो । अहिले भने यसले दर्जनौं मोडल बिक्री गर्दै आएको छ । बीवाईडीले सन् २०२१ को मे महिनामा १० लाख सवारी साधन उत्पादन गरेको थियो भने त्यसपछिको १८ महिनामै तीन गुणा पुर्याएको थियो । त्यसपछिको नौ महिनामा ५० लाख र फेरि सात महिनामै ७० लाख उत्पादन पुर्याउन सफल भएको हो । सन् २०२३ मा बीवाईडीको वार्षिक बिक्री ३० लाख २० हजार युनिटभन्दा बढी पुगेर न्यु इनर्जी भेहिकलको बजारमा ग्लोबल लिडर नै बन्न सफल भएको छ ।

यसैगरी यही वर्ष नै अन्तर्राष्ट्रिय बजारमा समेत दुई लाख ४० हजार युनिटभन्दा बढी कार निर्यात गरी बीवाईडी न्यु इनर्जी भेहिकलअन्तर्गत टप चाइनिज निर्यातकर्ता कम्पनी समेत बनेको छ । एक वर्षमै यो संख्या तीन सय ३७ प्रतिशतले बढेको हो । हाल विश्वका ६४ देश र क्षेत्रमा बीवाईडीका न्यु इनर्जी प्यासेन्जर गाडी बिक्री भइरहेका छन् । तीमध्ये थाइल्यान्ड, ब्राजिल, उज्वेकिस्तान र हंगेरीमा गाडी उत्पादन गर्ने कारखाना छन् । बीवाईडीले हाल इलेक्ट्रिक र प्लग इन हाइब्रिड सवारी साधन उत्पादनमा आफ्नो ध्यान केन्द्रित गरिरहेको छ ।