अडानको पाँचौँ केन्द्रीय परिषद् फागुन २८ मा

काठमाडौं ।
नेपाल अडिटर्स एसोसिएसन (अडान)को पाँचौँ परिषद् फागुन २८ गते हुने भएको छ । लेखा परीक्षकहरुको पेशागत संगठन अडान विगत झण्डै दुई दशकदेखि क्रियाशील रहेको छ । नियमनकारी निकाय नेपाल चार्टर्ड एकाउन्टेन्ट्स संस्थाका सदस्यहरु मात्र यस संस्थामा सदस्य हुन पाउने व्यवस्था छ । हाल क्षेत्रीय परिषद्हरु धमाधम हुँदै गरेको अडानले जनाएको छ ।

अडानका अनुसार विगतमा राष्ट्रिय अधिवेशनपछि मात्रै क्षेत्रीय परिषद् गरिन्थ्यो तर संघीयताको कार्यान्वयनपछि सांगठनिक रुपमा पनि परिवर्तन भएको छ । जिल्ला, प्रदेश र केन्द्र गरी तीन तहमा संगठन चलायमान भएको छ । पाँचौँ परिषद् गर्ने संस्थाको निर्णयबमोजिम यसपटक प्रदेश नं. २ को जनकपुर, वाग्मती प्रदेशको चितवन र कर्णाली प्रदेशको सुर्खेतमा प्रदेश परिषद् सम्पन्न भइसकेको अडानले जनाएको छ ।

यस्तै आगामी फागुन १५ गते लुम्बिनी प्रदेशको बुटवल, गण्डकी प्रदेशको पोखरा, सुदूरपश्चिम प्रदेशको धनगढीमा प्रदेश परिषद् हुने बताइएको छ । त्यस्तै यही फागुन १९ गते काठमाडौंको अल्फा हाउसमा उपत्यका प्रदेशको र फागुन २२ गते प्रदेश नम्बर १ को विराटनगरमा प्रदेश परिषद् सम्पन्न गरी २०७७ फागुन २८ गते काठमाडौंको कार्की ब्यांक्वेटमा केन्द्रीय परिषद् हुने कार्यक्रम रहेको अडानले जनाएको छ ।