रिचार्जरमा नौ सय ९९ रुपैयाँमै पल्स अक्सिमिटर, कोभिडका सामान निःशुल्क डेलिभरी

काठमाडौं ।
इ–कमर्स प्लेटफर्म रिचार्जरले कोभिडसँग सम्बन्धित उपकरण तथा सामानहरु सस्तो मूल्यमा उपलब्ध गराउने भएको छ । पेमेन्ट गेटवे इ–सेवासँगको सहकार्यमा रिचार्जरले बजारभन्दा सस्तो मूल्यमा अक्सिमिटर, क्यान अक्सिजन, मास्क, फेस शिल्ड, स्यानिटाइजर, पीपीई सेटलगायतका सामान निःशुल्क डेलिभरी गरिदिने भएको हो ।

पल्स अक्सिमिटर नौ सय ९९ रुपैयाँमा उपलब्ध गराउने रिचार्जरले जनाएको छ । रिचार्जरले मोबाइल एपमा सञ्चालन हुने ह्याप्पी आवर अफरमा निश्चित समयका लागि यो अफर सञ्चालन गर्न लागेको हो ।

वैशाख ३१ गते शुक्रबार दिउँसो १२ बजेदेखि ५ बजेसम्म सञ्चालन हुने ह्याप्पी आवरमा उल्लिखित मूल्यमा अक्सिमिटर अर्डर गर्न सकिने रिचार्जरले जनाएको छ । एक जना प्रयोगकर्ताले अधिकतम पाँच वटासम्म अक्सिमिटर खरिद गर्न सक्नेछन् ।

ह्याप्पी आवरमा अर्डर भएका अक्सिमिटरको निःशुल्क डेलिभरी हुनेछ भने अर्डर गरी इ–सेवाबाट भुक्तानी गर्नेहरुले मात्र उल्लिखित मूल्यमा अक्सिमिटर पाउने ग्लोबल कि टेक्नोलोजीका अध्यक्ष अलाइभ ग्लाइडरले बताए । कोरोना संक्रमण तीव्रदरमा बढिरहेका बेला अक्सिजनको लेभल हेर्न अक्सिमिटर जरुरी पर्ने भएकाले सस्तो मूल्यमा विना कुनै शुल्क घरमा नै अक्सिमिटर उपलब्ध गराउनलागेको रिचार्जरले जनाएको छ ।

यसका साथै रिचार्जरले सात लिटरसम्मको पोर्टेबल अक्सिजन कन्सन्ट्रेटर ६० देखि ८२ हजार रुपैयाँमा उपलब्ध गराउनेछ भने अक्सि ९९ क्यान अक्सिजन पाँच सय ४९ रुपैयाँमा, सर्जिकल मास्क पाँच रुपैयाँमा, के९५ मास्क १५ रुपैयाँमा, कोरियन मास्क ३५ रुपैयाँमा, फेस शिल्ड ५५ रुपैयाँमा, सय मिलिलिटरको ह्याण्ड स्यानिटाइजर ७५ रुपैयाँमा उपलब्ध गराउने रिचार्जरले जनाएको छ । त्यसैगरी गाडी तथा रुम स्प्रे स्यानिटाइजर तीन सय ५० रुपैयाँ, पाँच लिटरको स्यानिटाइजर सात सय ९९ देखि नौ सय ९९ रुपैयाँका साथै थर्मल गन नौ सय ९९ रुपैयाँमा उपलब्ध हुनेछ ।

विभिन्न किसिमका पीपीई सेट बजार मूल्यभन्दा सस्तोमा उपलब्ध हुनेछ । गुगल प्ले तथा एप्पलको एप स्टोरबाट रिचार्जरको एप डाउनलोड गरी खाता सञ्चालन गर्दा एक हजार क्यास प्वाइन्ट पाइन्छ । यसरी पाइने क्यास प्वाइन्टलाई सामान खरिद गर्दा छुटका रुपमा रिडिम गर्न सकिन्छ ।