युनाइटेड सिमेन्ट्सद्वारा कम्प्युटर तथा सिलाइ मेसिन प्रदान

काठमाडौं । युनाइटेड सिमेन्ट्स प्रालिले धुनिबेसी ९ को वडा कार्यालयलाई कम्प्युटर तथा सिलाइ मेसिन हस्तान्तरण गरेको छ । कम्पनीले आफ्नो सामाजिक उत्तरदायित्वअन्तर्गत वडा कार्यालयलाई १५ थान सिलाइ मेसिन, १० थान कम्प्युटर तथा यसको उपयोग गर्न आवश्यक पर्ने टेबल तथा कुर्सी हस्तान्तरण गरेको जनाएको छ ।

कम्पनीले बुधबार नगरपालिका कार्यालयमा एक कार्यक्रमको आयोजना गरी उक्त सामग्री हस्तान्तरण गरेको हो । कार्यक्रममा धुनिबेसी नगरपालिका उपप्रमुख सुरज उप्रेती, वडा नं. ९ का अध्यक्ष माधव प्रसाद सिलवाललगायतको उपस्थिति थियो । कार्यक्रममा युनाइटेड सिमेन्ट्सका प्रमुख कार्यकारी अधिकृत भरत दाहालले शिक्षा तथा स्वास्थ्यजस्ता आधारभूत क्षेत्रमा कम्पनीले सहयोग गर्दै आएको बताए । साथै उनले त्यसै वडामा केही वर्षपहिले एम्बुलेन्स पनि हस्तान्तरण गरेको तथा स्वास्थ्य चौकी स्थापनाका निम्ति युनाइटेड सिमेन्ट्सले जग्गा पनि उपलब्ध गराएको जानकारी दिए ।

कार्यक्रममा वडा अधक्ष माधव सिलवालले युनाइटेड सिमेन्ट्सको यो कार्य एकदमै प्रशंसनीय रहेको बताए । ललितपुरको लेलेमा रहेको आफ्नै चुनढुंगा खानी तथा धादिङमा रहेको उद्योगबाट युनाइटेड सिमेन्ट्सले विगत सात वर्षदेखि गुणस्तरीय सिमेन्ट उत्पादन गर्दै आएको कम्पनीले जनाएको छ ।