बउमा कोनएक्स्पोमा महासंघ सहभागी हुने

काठमाडौं । भारतमा आयोजना हुने बउमा कोनएक्स्पो २०२३ मा नेपाल निर्माण व्यवसायी महासंघ पनि सहभागी हुने भएको छ । एक्स्पोमा सहभागी हुन महासंघका अध्यक्ष रवि सिंह भारतको उत्तर प्रदेश गएका छन् ।

ग्रेटर नोइडामा चार दिनसम्म चल्ने एक्स्पोमा निर्माण उद्योगमा भित्रिएका अत्याधुनिक उपकरण, सामग्रीसहित निर्माण क्षेत्रमा प्रयोग हुने सबैखाले पछिल्ला सरसामानहरू प्रदर्शनीका लागि राखिनेछन् । मंगलबारदेखि सुरु हुने प्रदर्शनीमा २० भन्दा बढी मुलुकका करिब छ सय प्रविधि सप्लायर्सको सहभागिता रहनेछ भने ६० देशका ५० हजारभन्दा बढीले १० हजार स्टलहरू अवलोकन गर्ने अपेक्षा गरिएको छ ।

एसिया तथा पश्चिम प्रशान्त क्षेत्रका निर्माण व्यवसायीहरूको छाता संस्था इफाप्काका अध्यक्ष समेत रहेका महासंघ अध्यक्ष सिंहलाई अतिथिको रुपमा एक्स्पोमा आमन्त्रण गरिएको हो । सोही अवसरमा अध्यक्ष सिंहले निर्माण उद्योगसँग सम्बन्धित पछिल्ला प्रविधिका बारेमा विज्ञहरूसँग छलफल गर्नेछन् । महासंघ एक्स्पोको सपोर्टरको भूमिकामा छ ।