मनकामना दर्शनद्वारा फोहोर व्यवस्थापनको लागि गाउँपालिकालाई ट्र्याक्टर र ट्रेलर हस्तान्तरण

काठमाडौं । मनकामना दर्शन प्रालिले फोहोर व्यवस्थापनको लागि सहिद लखन गाउँपालिकालाई ट्र्याक्टर र ट्रेलर हस्तान्तरण गरेको छ । कम्पनीले आफ्नो व्यावसायिक सामाजिक उत्तरदायित्वअन्तर्गत गाउँपालिकालाई विशेषतः वडा नं. २ र ३ को फोहोर व्यवस्थापन कार्यको लागि १ थान महिन्द्रा ट्याक्टर र हाइड्रोलिक ट्रेलर हस्तान्तरण गरेको हो । कुरिनटारस्थित अग्नी इन्कर्पोरेटेड प्रालिको अफिस प्रांगणमा सोमबार आयोजित कार्यक्रममा कम्पनीका निर्देशक राजेश बाबु श्रेष्ठले गाउँपालिका अध्यक्ष रमेश बाबु थापालाई उक्त सामग्री हस्तान्तरण गरेका हुन् ।

उक्त कार्यक्रममा गाउँपालिका उपाध्यक्ष, वडा नं.२, ३ र ४ का वडाध्यक्ष, फोहोरमैला व्यवस्थापनका समितिका अध्यक्ष तथा सदस्यहरुको लगायत यस प्रालिका उच्च व्यवस्थापनका कर्मचारीहरुको सहभागिता थियो । उक्त ट्र्याक्टरले मनकामना क्षेत्रको फोहोर व्यवस्थापन र पर्यावरणमा समेत सकारात्मक कार्य एवं सशक्त प्रभाव रहने कम्पनीको विश्वास छ ।