नुवाकोटमा सुन अभाव

नुवाकोट । जिल्लाका सुनचाँदी व्यवसायीहरुले सुनको चरम अभाव भोगिरहेको गुनासो गरेका छन् । माग अनुसारको सुन नहुँदा व्यवसायी पुरानो सुन खरिद गर्न बाध्य भएको उनीहरुको गुनासो छ । नुवाकोट सुनचाँदी व्यवसायी संघको शनिबार सम्पन्न नवौँ र १०औँ वार्षिक साधारणसभामा सहभागी व्यवसायीहरुले हालसम्म जेनतेन माग धानिरहे पनि आगामी दिनमा माग धान्न मुस्किल हुने बताए ।

संघका अध्यक्ष भीमराज बज्राचार्यले संघले बैंकमार्फत गत आ.व.२०७७/०७८ र ०७८/०७९ मा २३ केजी सुन प्राप्त गरेको जानकारी दिए । जिल्लामा मासिक पाँच केजी सुनको माग रहे पनि बैंकमार्फत एक केजी मात्र सुन पाइने गरेको उनले गुनासो गरे ।

नुवाकोट उद्योग वाणिज्य संघको पूर्वअध्यक्ष एवं सुनचाँदी व्यवसायी संघ नुवाकोटको वरिष्ठ सल्लाहकार शरण उत्सुक सापकोटाले सुनचाँदी व्यवसायले वार्षिक लाखौँ राजस्व बुझाए पनि सरकारले व्यवसायीको समस्या समाधान गर्न चासो नदेखाएको बताए । सरकारले १५ वर्षदेखि सुनमा लगाएको कोटा प्रणाली र बैंकहरूले मात्र आयात र बिक्री गर्न पाउने नियन्त्रित बजार व्यवस्था गरेर व्यवसायीलाई अपमान गरिरहेको उनले बताए । यस्तै संघका सदस्य ईश्वर सुनारले सुनको मूल्य बढे पनि माग नघटेको तर सुन खरिद गर्न नपाएको बताए ।

साधारणसभामा विदुर नगरपालिकाका प्रमुख राजन श्रेष्ठले सुनचाँदी व्यवसायलाई घरेलु उद्योगको रूपमा विकास गरी स्थानीय युवायुवतीलाई सीपमूलक तालिम दिएर लाभ लिन सकिने बताए । परम्परागत गरगहना बनाउन स्थानीय कालिगढ निर्भर हुनसक्ने गरी प्रशिक्षण दिन नगरपालिकाले संघसँग समन्वय गर्ने समेत बताए ।