नेपालमा पनि मनाइयो ‘युनिभर्सल एसप्टेन्स डे’

काठमाडौं । हरेक वर्षको २८ मार्चमा मनाइने युनिभर्सल एसप्टेन्स (यूए) डे नेपालमा पनि मनाइएको छ । कम्प्युटर एसोसिएन नेपाल महासंघ (क्यान महासंघ) र युथ आईजीएफ नेपालको संयुक्त आयोजनामा इन्टरनेट करपोरेसन फर असाइन्ड नेम्स एन्ड नम्बर्स (आईक्यान) सँगको समन्वयमा मंगलबार काठमाडौंमा एक विशेष कार्यक्रम गर्दै मनाइएको हो ।

उक्त कार्यक्रममा इन्टरनेट एक्सचेन्ज नेपालको सहयोग रहेको थियो भने इन्टरनेट पार्टनरमा वल्र्डलिंक कम्युनिकेसन्स लिमिटेड थियो । धेरै भाषा तथा लिपीमा डोमेन सपोर्ट गराउने उद्देश्यले विश्वभर नै इन्टरनेटको सार्वभौमिक स्वीकृति अर्थात् युनिभर्सल एसप्टेन्स डे मनाउने गरिन्छ । सेलिब्रेटिङ युनिभर्सल एसप्टेन्स डे: प्रोमोटिङ युनिभर्सल एसप्टेन्स डे एन्ड इन्टरनेसनलाइज्ड डोमेन नेम इन नेपाल शीर्षकमा गरिएको कार्यक्रममा बोल्ने वक्ताहरूले सबै वैध डोमेन नेम तथा इमेल एड्रेस सबैखालका इन्टरनेट एप्लिकेसन, डिभाइस तथा सिस्टमले उपयोग गर्नसक्ने कुराको सुनिश्चितता गराउन यो दिवसले महत्वपूर्ण भूमिका खेलेको बताएका थिए ।

इन्टरनेट करपोरेसन फर असाइन्ड नेम्स एन्ड नम्बर्स (आईक्यान)ले देवनागरीसहित विभिन्न विदेशी भाषामा इमेल गर्न तथा वेबसाइट अपलोड गर्न दिने स्वीकृति प्रदान गरेकाले यस्तो दिवस महत्वपूर्ण रहेको क्यान महासंघका अध्यक्ष रञ्जीत पोदारले बताए । यस्तै विद्युतीय सुशासन आयोगका प्रमुख कार्यकारी अधिकृत दिपेश विष्टले देवनागरीसहित ग्रामीण क्षेत्रका समुदायको स्थानीय भाषालाई सपोर्ट गर्ने गरी डोमेन प्रणालीको व्यवस्था गर्नुपर्नेमा जोड दिए । कार्यक्रममा ‘डोमेन नेम र इमेल एड्रेसको युनिभर्सल एसप्टेन्स’ विषयमा युथ आईजीएफ नेपालका सदस्य विवेक सिलवालले कार्यपत्र प्रस्तुत गरेका थिए । त्यस्तै दुई फरक विषयमा प्यानल छलफल समेत गराइएको थियो । साथै वक्ताहरूले यो दिवसलाई आगामी वर्षमा पनि नियमित रुपमा मनाइन र सर्वसाधारणमाझ चेतना विस्तार गर्न सुझाव दिएका थिए ।