मौलाकाली केबलकार १८ गतेबाट सञ्चालनमा आउने

काठमाडौं । मौलाकाली केबलकार प्रालिद्वारा प्रवद्र्धित मौलाकाली केवलकार यही वैशाख १८ गतेदेखि सञ्चालनमा आउने भएको छ । नवलपुर जिल्लाको गैंडाकोटमा रहेको केबलकारको वैशाख १ गतेदेखि परीक्षण सञ्चालन भएको थियो । केबलकारको वैशाख १८ गते प्रधानमन्त्री पुष्पकमल दाहाल प्रचण्डले औपचारिक रुपमा उद्घाटन गर्ने कार्यक्रम रहेको कम्पनीले जनाएको छ ।

आईएमई ग्रुपको मुख्य लगानी रहेको मौलाकाली केबलकारको निर्माण गत वर्षदेखि सुरु गरिएको थियो । गैंडाकोट १ बाट मौलाकाली मन्दिरसम्म १.२ किलोमिटर लामो केवलकारमा १२ वटा गोन्डोला रहेका छन् । केवलकारमार्फत बटम स्टेसनबाट टप स्टेसनसम्म पुग्न करिब पाँच मिनेटको समय लाग्छ । केबलकार सञ्चालनसँगै मौलाकालीको दर्शन तथा पूजाआजाका लागि जाने भक्तजनहरुका लागि सहज हुनेछ । केबलकारको माथिल्लो स्टेसनमा सुविधासम्पन्न ६० रुमको होटल, ब्यान्क्वेट हल र रेष्टुरेन्ट सञ्चालनमा रहनेछन् । केबलकार सञ्चालन भए पनि होटल सञ्चालनका लागि भने अझै केही महिना लाग्ने कम्पनीले जनाएको छ ।

यस केबलकार निर्माणसँगै नवलपुर र चितवन जिल्लाको पर्यटकीय पूर्वाधारमा उल्लेख्य योगदान पुग्ने विश्वास गरिएको छ । दुई अर्ब रुपैयाँभन्दा बढी लगानी रहेको सो परियोजनाको मुख्य लगानी आईएमई ग्रुपको रहेको छ ।

आईएमई ग्रुपकै मुख्य लगानी रहेको काठमाडौंको चन्द्रागिरिमा केवलकारसहितको नयाँ पर्यटकीय गन्तव्य निर्माण भई सञ्चालनमा रहेको छ । यस्तै यही ग्रुपको मुख्य लगानी रहेको लुम्बिनी केबलकार प्रा.लिद्वारा प्रवद्र्धित अर्को केवलकार परियोजना रुपन्देही जिल्लाको बुटवल बजारदेखि पाल्पाको बसन्तपुरमा निर्माणाधीन छ । यो केबलकार परियोजना पनि यसै महिनाको अन्त्यदेखि सञ्चालनमा आउने कम्पनीले जनाएको छ । आईएमई ग्रुपको लगानीमा सातवटै प्रदेशमा ठूला र नमूना पर्यटकीय पूर्वाधार निर्माणको चरणमा छन् ।