वैशाखमा एक अर्ब ६४ करोडको विदेशी लगानी स्वीकृत

वैशाख महिनामा एक अर्ब ६४ करोड ८३ लाख २० हजार रुपैयाँबराबरको विदेशी लगानी प्रतिबद्धता आएको उद्योग विभागले जनाएको छ । विभागका अनुसार २८ वटा उद्योगका लागि नयाँ विदेशी लगानी स्वीकृति भएको हो । कुल एक हजार दुई सय ७२ जनालाई रोजगारी दिनेगरी लगानी प्रतिबद्धता आएको विभागले जनाएको छ ।

विभागका अनुसार चैतमा ३३ वटा उद्योगका लागि सात अर्ब ५५ करोड १८ लाख रुपैयाँको विदेशी लगानी स्वीकृत भएको थियो । यी उद्योगमा एक हजार चार सय ४९ जनालाई रोजगारी प्रस्ताव गरिएको थियो ।चालू आर्थिक वर्षको १० महिना (साउनदेखि वैशाख)सम्म २९ अर्ब ७४ करोड एक लाख ४३ हजार सात सय चार रुपैयाँबराबरको विदेशी लगानी प्रतिबद्धता आएको विभागले जनाएको छ । यो लगानी दुई सय १९ उद्योग सञ्चालनका लागि आएकोे हो । यी उद्योगमा १२ हजार एक सय ७१ जनाले रोजगारी पाउने प्रस्ताव गरिएको छ ।

ठूलो रकममा लगानी प्रतिबद्धता आएको भए पनि साउनदेखि चैतसम्म एक अर्ब ६२ करोड १० लाख रुपैयाँ मात्रै लगानीको रूपमा विदेशबाट रकम नेपाल भित्रिएको राष्ट्र बैंकको तथ्यांकमा देखिन्छ ।विभागका अनुसार वैशाख महिनामा स्वदेशी तथा विदेशी गरी कुल ३१ वटा उद्योगका लागि ११ अर्ब ४५ करोड रुपैयाँको लगानी प्रस्ताव आएको छ । जसमा दुई हजार एक सय ५५ जनालाई रोजगारी प्रस्ताव गरिएको छ । वैशाखमा दर्ता भएका उद्योगमध्ये २६ वटा साना, तीनवटा ठूला र दुईवटा मझौला उद्योग छन् ।

चैतमा दर्ता भएका स्वदेशी तथा विदेशी उद्योगको संख्या ३३ थियो । जसमा कुल तीन हजार छ सय १२ जनालाई रोजगारी दिनेगरी २५ अर्ब ४४ करोड रुपैयाँ लगानी प्रस्ताव स्वीकृत भएको थियो ।चालू आर्थिक वर्षको साउनदेखि वैशाखसम्म स्वदेशी र विदेशी गरी कुल दुई सय ४८ उद्योगका लागि एक खर्ब ९२ अर्ब रुपैयाँबराबरको लगानी प्रस्ताव आएको छ । जसमा १८ हजार पाँच सय २४ जनाले रोजगारी पाउनेछन् । प्रस्तावित उद्योगमध्ये एक सय ३० वटा साना उद्योग हुन् । यस्तै ६२ वटा मझौला र ५६ वटा ठूला उद्योग दर्ता भएका छन् ।