नियामकीय प्रावधान मिच्ने तीन बैंकलाई कारबाही

काठमाडौं । नेपाल राष्ट्र बैंकले नियामकीय प्रावधान पालना नगर्ने तीन वाणिज्य बैंकलाई कारबाही गरेको छ । प्राइम कमर्सियल बैंक, कुमारी बैंक र हिमालयन बैंक कारबाहीमा परेका हुन् । यी बैंकले नियामकीय प्रावधान नमानेर संस्थागत सुशासन कायम नगरेको पाइएको राष्ट्र बैंकको सुपरीवेक्षण विभागले जनाएको छ ।

यी बैंकहरूमध्ये प्राइम कमर्सियल बैंकको बदमासी धेरै देखिएको छ । गत आर्थिक वर्षमा प्राइम बैंकले कर्जा नोक्सानी व्यवस्था कायम नगरेको, जोखिम भारित सम्पत्ति गणना गर्दा वास्तविकभन्दा कम गरेको र प्रिमियम दर बढाई ब्याज असुल गरेको भेटिएको हो । प्राइम बैंकले बदनियतपूर्वक नियामकीय प्रावधान मिचेर प्रिमियम दर बढाई ऋणीबाट बढी ब्याज असुलेको पाइएको हो । यसरी तीनवटा नियम मिच्दा पनि राष्ट्र बैंकले प्राइम बैंकका प्रमुख कार्यकारी अधिकृतलाई सचेत गराउने मात्र निर्णय गरेको छ । विगतमा राष्ट्र बैंकले प्रिमियम बढाउने बैंकहरूलाई कारबाही गर्दै रकम फिर्ता गराएको थियो ।

कुमारी र हिमालयन बैंकले कर्जा/निक्षेप अनुपात (सीडी रेसियो) कायम नगरेका कारण कारबाहीमा परेका छन् । राष्ट्र बैंकले यी दुई बैंकलाई नगद जरिबाना नै गरेको छ । कुमारी बैंकले २०७९ माघ महिनामा र हिमालयन बैंकले कात्तिक महिनामा कर्जा/निक्षेप अनुपात कायम नगरेको पाइएपछि राष्ट्र बैंकले नगद जरिबाना तिराएको हो ।

राष्ट्र बैंकले कुमारीलाई ५९ लाख ६३ हजार छ सय ९४ रूपैयाँ २२ पैसा जरिबाना तिराएको छ । यसैगरी हिमालयन बैंकलाई एक करोड ३९ लाख ६३ हजार ४७ हजार २८ रूपैयाँ २४ पैसा जरिबाना तिराएको छ ।