फाइनान्स कम्पनीहरूको औसत खराब कर्जा साढे पाँच प्रतिशत

काठमाडौं । फाइनान्स कम्पनीहरूमा १९ प्रतिशतसम्म कर्जा खराब देखिएको छ । मुलुकको अर्थतन्त्रमा देखिएको मन्दीसँगै कर्जावाला ग्राहकहरूले ऋणको सावाँ र ब्याज भुक्तानी गर्ने क्षमतामा आएको कमीले फाइनान्स कम्पनीहरूको निष्क्रिय कर्जा बढेको देखिन्छ ।

फाइनान्स कम्पनीहरूको औसत खराब कर्जा पाँच दशमलव ६९ प्रतिशत देखिएको छ । चारवटा फाइनान्स कम्पनीको औसतभन्दा बढी खराब कर्जा छ । ११ वटाको औसतभन्दा कम देखिएको छ ।

आम नागरिकको वास्तविक आम्दानी नबढेको र आम्दानीको ठूलो हिस्सा दैनिक उपभोग्य वस्तु तथा सेवाको खरिदमा खर्च हुंँदा अर्थतन्त्र चलायमान हुन सकेको छैन । अर्थतन्त्रमा देखिएको यही अवस्थाको नकारात्मक प्रभाव फाइनान्सहरूमा परेको हो । सञ्चालनमा रहेका १७ वटा फाइनान्स कम्पनीमध्येमा हालसम्म १५ वटा फाइनान्स कम्पनीले आर्थिक वर्ष २०७९/०८०को अपरिष्कृत वित्तीय विवरण सार्वजनिक गर्दा तीनवटा नेपाल फाइनान्स, गोर्खाज फाइनान्स र मल्टीपर्पस फाइनान्सबाहेक सबैको खराब कर्जा बढेको छ । सबैभन्दा बढी खराब कर्जा जानकी फाइनान्समा देखिएको छ भने सबैभन्दा कम मल्टीपर्पस फाइनान्सको छ । जानकीको १८ दशमलव ६५ प्रतिशत खराब कर्जा छ भने मल्टीपर्पसको शून्य दशमलव ७९ प्रतिशत रहेको छ । अघिल्लो आर्थिक वर्षमा जानकीको १६ दशमलव ६७ प्रतिशत खराब कर्जा थियो भने मल्टीपर्पसको १ दशमलव ३ प्रतिशत खराब कर्जा थियो ।

यसैगरी नेपाल फाइनान्स, गोर्खाज फाइनान्स र प्रोग्रेसिभ फाइनान्सको खराब कर्जा १२ दशमलव १६ प्रतिशत, १० दशमलव ४७ प्रतिशत र ९ दशमलव ९८ प्रतिशत छ । अघिल्लो आर्थिक वर्षमा यी फाइनान्सहरूमा खराब कर्जाको अनुपात क्रमशः १४ दशमलव शून्य ७ प्रतिशत, १३ दशमलव ९१ प्रतिशत र २ दशमलव ७८ प्रतिशत थियो । रिलायन्स, सेन्ट्रल र समृद्धि फाइनान्समा क्रमशः ४ दशमलव ९३ प्रतिशत, ४ दशमलव ९ प्रतिशत र ४ दशमलव ५९ प्रतिशत खराब कर्जा देखिएको छ । अघिल्लो आर्थिक वर्षमा यी फाइनान्सहरूमा यस्तो कर्जाको अनुपात क्रमशः ४ दशमलव २६ प्रतिशत, २ दशमलव ५९ प्रतिशत र ४ दशमलव ५८ प्रतिशत थियो । गुडविल, बेस्ट र मञ्जुश्री फाइनान्सको खराब कर्जा पनि क्रमशः ४ दशमलव शून्य ८ प्रतिशत, ३ दशमलव ३ प्रतिशत र २ दशमलव ८२ प्रतिशत देखिएको छ । अघिल्लो आर्थिक वर्षमा क्रमशः २ दशमलव ६५ प्रतिशत, २ दशमलव २४ प्रतिशत र ४ दशमलव १९ प्रतिशत थियो ।

आर्थिक वर्ष २०७९/०८० पोखरा र गुहेश्वरी मर्चेन्ट फाइनान्समा क्रमशः दुई दशमलव ५३ र दुई दशमलव शून्य नौ प्रतिशत खराब कर्जा देखिएको छ । अघिल्लो आर्थिक वर्षमा यी फाइनान्सहरूमा यस्तो कर्जाको अनुपात क्रमशः एक दशमलव ५५ प्रतिशत र शून्य दशमलव ७६ प्रतिशत थियो । यसैगरी, आईसीएफसी र श्री इन्भेष्टमेन्ट फाइनान्सको खराब कर्जा १ दशमलव ९९ र १ दशमलव शून्य पाँच प्रतिशत देखिएको छ । अघिल्लो आर्थिक वर्षमा यी फाइनान्सहरूमा यस्तो कर्जाको अनुपात शून्य दशमलव ५४ र एक दशमलव ३ प्रतिशत थियो ।