धितोपत्र बोर्डद्वारा भिजन लुम्बिनीलाई सेयर निष्काशनका लागि अनुमति

काठमाडौं । २५ मेगावाटको सेतीखोला जलविद्युत् आयोजनाको प्रवर्द्धन गर्दै आएको भिजन लुम्बिनी ऊर्जा कम्पनीले प्रारम्भिक सेयर (आईपीओ) निष्काशन गर्न नेपाल धितोपत्र बोर्डबाट स्वीकृति प्राप्त गरेको छ । ऊर्जा कम्पनीले आफ्नो जारी पुँजी एक अर्ब ९१ करोड पच्चीस लाख रुपैयाँको २० प्रतिशतले हुन आउने ३८ करोड २५ लाख रुपैयाँ बराबरको ३८ लाख २५ हजार कित्ता साधारण सेयर निष्काशन गर्न स्वीकृति पाएको हो ।

कम्पनीले जारी पुँजीको १० प्रतिशतले हुन आउने १९ लाख १२ हजार पाँच सय कित्ता साधारण सेयर आयोजना प्रभावित क्षेत्र कास्कीको माछापुच्छ्रे गाउँपालिकाको वडा नं १, २, ३, ४ र पोखरा महानगरपालिकाको वडा नं १९ का स्थानीय बासिन्दाका लागि साधारण सेयर जारी गर्नेछ भने अन्य बाँकी १० प्रतिशतमध्येको १० प्रतिशतले हुन आउने एक लाख ९१ हजार दुई सय ५० कित्ता साधारण सेयर नेपाल सरकारको सम्बन्धित निकायवाट श्रम स्वीकृति प्राप्त गरी विदेशमा बसी रोजगारी गरिरहेका नेपाली नागरिकका लागि पाँच प्रतिशत अर्थात् ९५ हजार छ सय २५ कित्ता साधारण सेयर सामूहिक लगानी कोष, दुई प्रतिशत अर्थात् ३८ हजार दुई सय ५० कित्ता कम्पनीमा कार्यरत कर्मचारीहरूका लागि र बाँकी १५ लाख ८७ हजार तीन सय ७५ कित्ता साधारण सेयर सर्वसाधारणहरूका लागि निष्काशन गर्न स्वीकृति पाएको छ ।

भाद्र ४ गते नेपाल धितोपत्र बोर्डले आईपीओ निष्काशनका लागि भिजन लुम्बिनी ऊर्जा कम्पनीलाई स्वीकृति दिएको हो । २०७५ मा कम्पनी कार्यालयमा दर्ता भई कम्पनीले ऊर्जा क्षेत्रमा कास्कीको माछापुच्छ्रे गाउँपालिकाको वडा नं १, २, ३, ४ र पोखरा महानगरपालिकाको वडा नं १९ मा २५ मेगावाटको सेती नदी जलविद्युत् आयोजनाको निर्माण गरिरहेको छ । करिब ९२ प्रतिशत काम सकिइसकेकाले अबको केही महिनाभित्रमै बत्ती बाल्ने तयारीमा रहेको कम्पनीका कार्यकारी अध्यक्ष जगतबहादुर पोखरेलले जानकारी दिएका छन् । कम्पनीमा एचआईडीसीएल, साइन रेसुङ्गा डेभलपमेन्ट बैंक, प्रभु लाइफ इन्स्योन्रेस, सिटिजन लाइफ इन्सुरेन्सलगायत करिब पन्ध्र सय जना संस्थापक सेयर सदस्यको लगानी रहेको छ । कम्पनीको धितोपत्र निष्काशन तथा बिक्री प्रबन्धक मुक्तिनाथ क्यापिटल लिमिटेड रहेको छ ।