ज्योति विकास बैंकद्वारा स्वास्थ्य चौकी र अस्पताललाई बेबी वार्मर प्रदान

काठमाडौं । ज्योति विकास बैंकले नुवाकोटको महाकाली स्वास्थ्य चौकी र तनहुँको आँबुखैरेनी अस्पताललाई बेबी वार्मर प्रदान गरेको छ । संस्थागत सामाजिक उत्तरदायित्व प्रयोजनार्थ स्थापना गरेको हाम्रो विकास प्रवर्द्धन कोषमार्फत राष्ट्रिय आविष्कार केन्द्रद्वारा स्वदेशमै निर्मित बेबी वार्मर (न्यानो नानी) प्रदान गरेको बैंकले जनाएको छ । बैंकले यी अस्पताललाई नवजात शिशुको शारीरिक तापक्रम उचित राख्न प्रयोग हुने बेबी वार्मर प्रदान गरेको हो ।

अस्पतालमा आयोजित कार्यक्रममा ज्योति विकास बैंकका विभिन्न पदाधिकारीबाट महाकाली स्वास्थ्य चौकी र आँबुखैरेनी अस्पतालका पदाधिकारीलगायत सम्बन्धित क्षेत्रका विभिन्न पदाधिकारीको उपस्थितिका बीच सो बेबी वार्मर औपचारिकरूपमा हस्तान्तरण गरिएको हो । साथै, सोही कार्यक्रमका बीच अस्पतालका डाक्टर, नर्सलगायत सम्बन्धित कर्मचारीलाई आविष्कार केन्द्रका स्वास्थ्य इन्जिनियरमार्फत बेबी वार्मर सञ्चालनसम्बन्धी विशेष तालिम पनि प्रदान गराइएको थियो । नवजात शिशुको शारीरिक तापक्रम उचित राख्न प्रयोग हुने उक्त मेसिनबाट नुवाकोट जिल्लाको शिवपुरी गाउँपालिका वडा नं ५, शेरावगरस्थित महाकाली स्वास्थ्य चौकी र तनहुँ जिल्लाको आँबुखैरेनी गाउँपालिका वडा नं ३ स्थित आँबुखैरेनी अस्पतालमा प्रसूति सेवा लिन आउने प्रत्यक्षरूपमा लाभान्वित हुने बताइएको छ ।

बैंकले डा महावीर पुनद्वारा प्रवद्र्धित राष्ट्रिय आविष्कार केन्द्रसँगको सहकार्यमा ‘न्यानो नानी परियोजना’अन्तर्गत पछिल्लो तीन वर्षमा देशका ३५ विभिन्न अस्पताललाई बेबी वार्मर प्रदान गरिसकेको बताइएको छ । आफ्नो खुद नाफाबाट नेपालमा हाल सञ्चालनमा रहेका अन्य बैंक तथा वित्तीय संस्थाहरूले सामाजिक उत्तरदायित्वअन्तर्गत समाजिक कार्यमा गर्ने योगदानभन्दा ५० प्रतिशत बढी रकम छुट्याई समाजप्रति उत्तरदायी बनेको यस विकास बैंकले नागरिकको सर्वोत्तम हित सदा उच्च प्राथमिकतामा राखेको जनाएको छ ।