तीन खर्ब ६९ अर्ब नाघ्यो वाणिज्य बैंकहरूको चुक्ता पुँजी

काठमाडौं । वाणिज्य बैंकहरूको कुल चुक्ता पुँजी तीन खर्ब ६९ अर्ब ८५ करोड ७० लाख रूपैयाँ पुगेको छ । नेपाल राट्र बैंकका अनुसार सञ्चालनमा रहेका २० वटा वाणिज्य बैंकहरूको चुक्ता पुँजी आर्थिक वर्ष २०७९/८० को असार मसान्तसम्म तीन खर्ब ६९ अर्बमाथि पुगेको हो । वाणिज्य बैंकहरूले कायम गरेको यो चुक्ता पुँजी आर्थिक वर्ष २०७८/७९ को तुलनामा १३ अर्ब ७६ करोड २० लाख रूपैयाँले बढी हो । उक्त अवधिमा वाणिज्य बैंकहरूको कुल चुक्ता पुँजी तीन खर्ब ५६ अर्ब नौ करोड ५० लाख रूपैयाँ थियो ।

आर्थिक वर्ष २०७९/०८० मा वाणिज्य बैंकहरूमा कायम रहेको चुक्ता पुँजीलाई आधार मान्दा सबैभन्दा बढी चुक्ता पुँजी ग्लोबल आईएमई बैंकको छ । यस अवधिमा ग्लोबलको चुक्ता पुँजी ३५ अर्ब ७७ करोड १० लाख ६० हजार रूपैयाँ छ । ग्लोबलपछि चुक्ता पुँजी बढी हुने दोस्रो बैंक नेपाल इन्भेष्टमेन्ट मेगा बैंक लिमिटेड छ । यो बैंकको चुक्ता पुँजी ३४ अर्ब १२ करोड ८५ लाख ९५ हजार रूपैयाँ छ । बढी चुक्ता पुँजी हुने तेस्रो ठूलो बैंक नबिल बैंक हो । नबिलको चुक्ता पुँजी २७ अर्ब पाँच करोड ६९ लाख ९७ हजार रूपैयाँ कायम छ । कुमारी बैंकको २६ अर्ब २२ करोड ५८ लाख ६१ हजार रूपैयाँ चुक्ता पुँजी कायम छ । कुमारी धेरै चुक्ता पुँजी हुने चौथो बैंक बनेको छ । लक्ष्मी सनराइज बैंक र हिमालयन बैंकको चुक्ता पुँजी क्रमशः २१ अर्ब ६७ करोड दुई लाख ३८ हजार र २१ अर्ब ६५ करोड ६६ लाख १५ हजार रूपैयाँ छ ।

यस्तै सिद्धार्थ, कृषि विकास र एनआईसी एसिया बैंकले क्रमशः १४ अर्ब आठ करोड ९९ लाख ८० हजार, १८ अर्ब ८८ करोड ४३ लाख ८६ हजार र ११ अर्ब ५६ करोड ४० लाख रूपैयाँ चुक्ता पुँजी कायम गरेका छन् । प्रभु र नेपाल बैंकको चुक्ता पुँजी क्रमशः २३ अर्ब ५४ करोड २४ लाख ९० हजार र १४ अर्ब ६९ करोड ४० लाख २२ हजार रूपैयाँ कायम छ । सानिमा, नेपाल एसबीआई, एनएमबी र राष्ट्रिय वाणिज्य बैंकको चुक्ता पुँजी क्रमशः १२ अर्ब ४६ करोड एक लाख १५ हजार, १० अर्ब १२ करोड छ लाख २८ हजार, १८ अर्ब ३६ करोड ६७ लाख छ हजार र १५ अर्ब ६३ करोड ७३ लाख ७७ हजार रूपैयाँ पुगेको छ । यसैगरी एभरेष्ट र माछापुच्छ्रे बैंकको क्रमशः १० अर्ब ६९ करोड ८० लाख ९४ हजार र १० अर्ब २५ करोड ७१ लाख ५५ हजार रूपैयाँ चुक्ता पुँजी कायम गरेको छ ।

आव २०७९/८० मा प्राइम कमर्सियल बैंक, सिटिजन्स बैंक इन्टरनेसनल र स्टान्डर्ड चार्टर्ड बैंक नेपाल लिमिटेडले क्रमशः १९ अर्ब ४० करोड २५ लाख ७५ हजार, १४ अर्ब २० करोड नौ लाख ७४ हजार र नौ अर्ब ४२ करोड ९४ लाख रूपैयाँ रहेको छ ।