पर्यटकीय क्षेत्रमा बैंकहरूको दुई खर्ब ११ अर्ब रुपैयाँ कर्जा

काठमाडौं । पर्यटकीय अर्थात् होटल तथा रेस्टुरेन्ट क्षेत्रमा बैंक तथा वित्तीय संस्थाहरुको कर्जा लगानी बढेको छ । नेपाल राष्ट्र बैंकका अनुसार सञ्चालनमा रहेका ५४ वटा बैंक तथा वित्तीय संंस्थाले आर्थिक वर्ष २०७९/८० मा होटल तथा रेस्टुरेन्ट क्षेत्रमा मात्र कुल दुई खर्ब ११ अर्ब १६ करोड रुपैयाँ कर्जा प्रवाह गरेका छन् । यो कर्जा अघिल्लो अर्थात् आव २०७८/७९ को तुलनामा १० अर्ब ६६ करोड ५० लाख रुपैयाँले बढी हो । उक्त अवधिमा बैंकिङ क्षेत्रको होटल तथा पर्यटन क्षेत्रमा प्रवाह भएको कुल कर्जा रकम दुई खर्ब ४९ करोड ४० लाख रुपैयाँ थियो ।

राष्ट्र बैंकका अनुसार आर्थिक वर्ष २०७९/८० मा होटल तथा पर्यटन क्षेत्रमा प्रवाह भएको कुल कर्जा रकममध्ये वाणिज्य बैंकहरुले मात्र एक खर्ब ८२ अर्ब २६ करोड ९० लाख रुपैयाँ कर्जा प्रवाह गरेका छन् । यो कर्जा अघिल्लो आर्थिक वर्षको तुलनामा छ अर्ब ६३ करोड १० लाख रुपैयाँले कम हो । अघिल्लो आर्थिक वर्षमा वाणिज्य बैंकहरुको यस्तो कर्जा एक खर्ब ७५ अर्ब ६३ करोड ८० लाख रुपैयाँ थियो ।

विकास बैंकहरुले पनि होटल तथा पर्यटन क्षेत्रमा २४ अर्ब २१ करोड ५० लाख रुपैयाँ कर्जा प्रवाह गरेका छन् । यो कर्जा अघिल्लो आर्थिक वर्षको तुलनामा तीन अर्ब ७७ करोड २० लाख रुपैयाँले बढी हो । अघिल्लो आर्थिक वर्षमा विकास बैंकहरुको यस्तो कर्जा २० अर्ब ४४ करोड ३० लाख रुपैयाँ थियो ।

फाइनान्स कम्पनीहरुले पनि गत असार मसान्तसम्म होटल तथा पर्यटन क्षेत्रमा चार अर्ब ६७ करोड ६० लाख रुपैयाँ कर्जा प्रवाह गरेका छन् । यो कर्जा अघिल्लो आर्थिक वर्षको तुलनामा २६ करोड ३० लाख रुपैयाँले बढी हो । अघिल्लो वर्ष फाइनान्स कम्पनीहरुको यस्तो कर्जा चार अर्ब ४१ करोड ३० लाख रुपैयाँ थियो ।

राष्ट्र बैंकका अनुसार आर्थिक वर्ष २०७९/८० मा लघुवित्तबाहेक समग्र बैंकिङ क्षेत्रको कुल कर्जा रकम ४८ खर्ब ७३ अर्ब ८० करोड ७० लाख रुपैयाँ छ । जसमध्ये वाणिज्य बैंकको ४३ खर्ब आठ अर्ब ९९ करोड, विकास बैंकहरुको चार खर्ब ७१ अर्ब ८८ करोड ६० लाख र फाइनान्स कम्पनीहरुको ९२ अर्ब ९३ करोड १० लाख रुपैयाँ छ । अघिल्लो आर्थिक वर्षमा बैंकिङ क्षेत्रको कुल कर्जा रकम ४७ खर्ब नौ अर्ब पाँच करोड रुपैयाँ थियो ।

उक्त कर्जामध्ये वाणिज्य बैंकको ४१ खर्ब ७७ अर्ब ८१ करोड २० लाख, विकास बैंकहरुको चार खर्ब ४४ अर्ब ९३ करोड ४० लाख र फाइनान्स कम्पनीहरुको ८६ अर्ब ३६ करोड रुपैयाँ थियो । राष्ट्र बैंकका अनुसार गत आर्थिक वर्षमा लघुवित्त वित्तीय संस्थाबाहेककको समग्र बैंकिङ क्षेत्रको कुल निक्षेप रकम ५७ खर्ब ७१ अर्ब २३ करोड ८० लाख रुपैयाँ थियो । अघिल्लो आर्थिक वर्षमा समग्र बैंकिङ क्षेत्रको कुल निक्षेप ५१ खर्ब ५९ अर्ब १७ करोड ५० लाख रुपैयाँ थियो ।