एक वर्षमा १७ अर्ब बढ्यो बैंकहरूको चुक्ता पुँजी

v
काठमाडौँ । पछिल्लो एक वर्षभित्रमा बैंक तथा वित्तीय संस्थाहरुको कुल चुक्ता पुँजी १७ अर्ब २६ करोड ३० लाख रुपैयाँले बढेको छ । लघुवित्त वित्तीय संस्थाबाहेक सबै बैंकिङ क्षेत्रको निक्षेप तथा कर्जा प्रवाहसम्बन्धी नेपाल राष्ट्र बैंकको पछिल्लो प्रतिवेदनअनुसार आर्थिक वर्ष २०७९/८० मा बैंकिङ क्षेत्रको कुल चुक्ता पुँजी अघिल्लो आर्थिक वर्षको तुलनामा १७ अर्ब रुपैयाँले बढेर चार खर्ब २५ अर्ब पाँच करोड २० लाख रुपैयाँ पुगेको हो ।

सञ्चालनमा रहेका बैंक तथा वित्तीय संस्थाहरुको कुल संख्या भने समीक्षा अवधिमा ५४ मा झरेको छ । राष्ट्र बैंकका अनुसार वाणिज्य बैंकको संख्या २०, क्षेत्रीय र राष्ट्रियस्तरका विकास बैंकहरुको संख्या १७ र फाइनान्स कम्पनीहरुको संख्या १७ रहेको छ । राष्ट्र बैंकका अनुसार आर्थिक वर्ष २०७८/७९ मा भने बैंकिङ क्षेत्रको कुल चुक्ता पुँजी चार खर्ब सात अर्ब ७८ करोड ९० लाख रुपैयाँ थियो । उक्त अवधिमा सञ्चालनमा रहेका बैंक तथा वित्तीय संस्थाहरुको कुल संख्या ६० वटा थियो । जसमध्ये वाणिज्य बैंकहरुको संख्या २६, विकास बैंकहरुको संख्या १७ र फाइनान्स कम्पनीहरुको संख्या १७ वटा थियो । पछिल्लो अवधिमा बैंकिङ क्षेत्रमा कायम रहेको कुल चुक्ता पुँजीमध्ये वाणिज्य बैंकहरुमा मात्र कायम रहेको कुल चुक्ता पुँजी तीन खर्ब ६९ अर्ब ८५ करोड ७० लाख रुपैयाँ छ । जुन अघिल्लो आर्थिक वर्षको तुलनामा १३ अर्ब ७६ करोड २० लाख रुपैयाँले कम हो । अघिल्लो आर्थिक वर्षमा वाणिज्य बैंकहरुको कुल चुक्ता पुँजी तीन खर्ब ५६ अर्ब नौ करोड ५० लाख रुपैयाँ कायम थियो ।

राष्ट्र बैंकका अनुसार विकास बैंकहरुले पछिल्लो अवधिमा ४० अर्ब २० करोड ७० लाख रुपैयाँ चुक्ता पुँजी कायम गरेका छन् । विकास बैंकहरुमा कायम रहेको यो चुक्ता पुँजी अघिल्लो आर्थिक वर्षको तुलनामा तीन अर्ब २१ करोड ३० लाख रुपैयाँ बढी हो । अघिल्लो आर्थिक वर्षमा विकास बैंकहरुमा कुल ३६ अर्ब ९९ करोड ४० लाख रुपैयाँ चुक्ता पुँजी थियो ।

यसैगरी फाइनान्स कम्पनीहरुले भने पछिल्लो अवधिमा कुल १४ अर्ब ९८ करोड ८० लाख रुपैयाँ चुक्ता पुँजी कायम गरेका छन् । यो चुक्ता पुँजी अघिल्लो आर्थिक वर्षको तुलनामा २८ करोड ८० लाख रुपैयाँले बढी हो । राष्ट्र बैंकका अनुसार अघिल्लो आर्थिक वर्षमा फाइनान्स कम्पनीहरुको कुल चुक्ता पुुँजी १४ अर्ब ७० करोड रुपैयाँ रहेको थियो । चुक्ता पुँजीसँगै पछिल्लो समय बैंकिङ क्षेत्रको कुल शाखासंख्या पनि बढेको छ ।

पछिल्लो समय बैंक तथा वित्तीय संस्थाहरुको कुल शाखासंख्या छ हजार चार सय ६१ वटा पुगेको छ । जसअन्र्तगत वाणिज्य बैंकहरुको पाँच हजार ४९, विकास बैंकहरुको एक हजार एक सय २८ र र फाइनान्स कम्पनीहरुको दुई सय ८४ वटा शाखाहरु सञ्चालनमा छन् । अघिल्लो आर्थिक वर्षमा भने बैंकिङ क्षेत्रको कुल शाखासंख्या छ हजार तीन सय ९४ रहेको थियो । उक्त शाखामध्ये वाणिज्य बैंकहरुको पाँच हजार नौ, विकास बैंकहरुको एक हजार एक सय १८ र फाइनान्स कम्पनीहरुको दुई सय ६७ वटा शाखाहरु सञ्चालनमा रहेको राष्ट्र बैंकको भनाइ छ ।