गैरआवासीय नेपाली संघको बैंक खाता रोक्का गर्न निवेदन

काठमाडौं । गैरआवासीय नेपाली संघ (एनआरएनए)को नाममा रहेका विभिन्न बैंकको खाता रोक्का गर्न असन्तुष्ट पक्षले निवेदन दिएका छन् । संघको निर्वाचनमा पराजय व्योहोरेपछि आफूले आफैँलाई अध्यक्ष घोषणा गरेका आरके शर्माले संघको नाममा रहेका विभिन्न बैंकको खाता रोक्काका लागि निवेदन दिएका हुन् ।

शर्माले ११औँ महाधिवेशनअघि कोषाध्यक्षको भूमिकामा रहेका लोक दाहाल र सुनिल साहमार्फत संघको नाममा रहेका १८ वटा खाता बन्द गर्न निवेदन दिएका छन् । संघको खाता भएका बैंकहरूमा पत्राचार भएको र यसबारे परराष्ट्र र संघका प्रमुख कार्यकारी अधिकारी अधिकृत (सीईओ) राजेन्द्रकुमार राउतलाई पनि जानकारी गराइएको संघका शर्मा पक्षीय महासचिव बुद्धि सुवेदीले जानकारी दिए । ‘बैंकहरूलाई पत्राचारका साथै आइतबार सीईओलाई पनि तत्काल खाता सञ्चालन नगर्न भनेर हामीले मौखिकरूपमा समेत भनेका छौँ’, उनले भने ।

आइतबार शर्मा आफूपक्षीय पदाधिकारीहरूसहित नियमित कार्यसञ्चालनका लागि भन्दै बालुवाटारस्थित संघको कार्यालयमा पुगेका थिए । तर, अध्यक्षको कोठा बन्द गरिएका कारण शर्माले प्रवेश पाएनन् । त्यसपछि उनले सीईओसहितका कर्मचारीहरूसँग छलफल गरेका थिए । सो क्रममा शर्माले संघको नाममा रहेका कुनै पनि बैंक खाताबाट तत्काल आर्थिक कारोबार नगर्न र कार्यालयको साँचो जिम्मा लगाउन आग्रका सीईओलाई आग्रह गरेका थिए । तर, सो क्रममा राउतले संघको सम्पूर्ण तालाचाबी संघका अध्यक्ष डा. बद्री केसीसँग रहेको जानकारी गराएका थिए ।

यस्तै शर्माले नेतृत्व गरेको एनआरएनए आईसीसीले आधिकारिकताको दाबी गर्दै शुक्रबार परराष्ट्र मन्त्रालयमा निवेदन दिएको थियो । आइतबार शर्मासहितका पदाधिकारीले परराष्ट्रमा पुगेर आधिकारिकताका लागि आवश्यक कागजपत्रहरू समेत पेस गरेका छन् । आफूहरूले सहसचिव अमृत राईलाई आधिकारिकताको निवेदनअनुसार आवश्यक प्रमाणहरू हस्तान्तरण गरेको भन्दै महासचिव सुवेदीले छिटै फाइल अध्ययन गरेर प्रक्रिया अघि बढाउने आश्वासन दिएको बताए । राईले धाँधली भएको कुरा विभिन्न माध्यमबाट आएको भन्दै मन्त्री एनपी साउदसँग परामर्श गरेर नियमसंगत ढंगले अघि बढ्ने कुरा बताएका थिए ।

अनलाइन माध्यमबाट गत अक्टोबर १९ मा भएको निर्वाचनमा धाँधली भएको भन्दै असन्तुष्ट समूहले शर्माको नेतृत्वमा नयाँ कार्यसमितिको घोषणा गरेको थियो । सोही समितिले अधिवेशन सम्पन्न गरेको सहितका कागजपत्र पेस गर्दै परराष्ट्र मन्त्रालयमा आफूहरू आधिकारिक रहेको दाबी गरेको बताइएको छ । उक्त निवेदन परराष्ट्रमा ११२३ नम्बरमा दर्ता गरिएको छ । परराष्ट्रमा दर्ता गरिएको निवेदनमा अध्यक्ष आरके शर्मा, महासचिव बुद्धि सुवेदीसहित पदाधिकारीहरूको नामावली पेस गरिएको छ । अनलाइन माध्यमबाट गत अक्टोबर १९ मा भएको निर्वाचनमा भने संघको अध्यक्षमा डा. बद्री केसी निर्वाचित भएका थिए ।