जीवन विकास लघुवित्तद्वारा राजवंशी सम्मानित

काठमाडौं । जीवन विकास लघुवित्त वित्तीय संस्थाले राष्ट्रिय महिला कबड्डी टोलीकी कप्तान मेनुकाकुमारी राजवंशीलाई सम्मान गरेको छ । संस्थाले १९औँ एसियाली खेलकुदको कास्य पदक जित्ने नेपाली टोलीको नेतृत्व गरेकी राजवंशीलाई नगद ५१ हजार रुपैयाँसहित सम्मान गरेको हो ।

मोरङको कटहरी गाउँपालिकामा केन्द्रीय कार्यालय रहेको संस्थाले जहदा गाउँपालिकाकी स्थायी बासिन्दा राजवंशीले खेल क्षेत्रबाट राष्ट्रका लागि योगदान दिएका कारण सम्मान गरेको बताइएको छ । उनलाई कोशी प्रदेशका मुख्यमन्त्री केदार कार्की र जीवन विकास समाजका संस्थापक अध्यक्ष तथा मोरङ क्षेत्र नम्बर पाँचबाट निर्वाचित प्रतिनिधिसभा सदस्य योगेन्द्र मण्डलले नगद र सम्मान पत्र प्रदान गरेका हुन् ।