मेगा बैंकले गण्डकी विकास बैंकलाई प्राप्ति गर्ने, चुक्ता पुँजी १३ अर्ब १३ करोड रूपैयाँ नाघ्ने

काठमाडौँ, जेठ ७
मेगा बैंकले राष्ट्रियस्तरको गण्डकी विकास बैंकलाई प्राप्ति गर्ने भएको छ । प्राप्ति प्रक्रियामा जानको लागि मेगाले यही जेठ २१ गते बैंकको केन्द्रीय कार्यालय कमलादीमा विशेष सभाको आह्वान गरेको छ । उक्त सभाले प्राप्तिको लागि आवश्यक सबै प्रक्रिया गर्ने प्रस्ताव पारित गर्नेछ । प्राप्तिको लागि मेगाले एकबराबर एकको सेयर अनुपात कायम गरेको छ । यी सबै प्रस्तावहरू मेगाको जेठको तेस्रो सातामा हुुने विशेष सभाले पारित गर्नेछ ।

यसैगरी गण्डकी विकास बैंकले पनि सोही दिन बैंकको केन्द्रीय कार्यालय चिप्लेढुंगामा विशेष साधारणसभाको आह्वान गरेको छ । सभाले मेगासँग प्राप्तिमा जाने प्रस्तावका अतिरिक्त गण्डकी विकास बैंकको एक कित्ताबराबर मेगा बैंकको एक कित्ता सेयर हुुने गरी स्वाप रेसियो कायम गर्नेछ । प्राप्तिपश्चात् बन्ने मेगाको चुक्ता पुँजी १३ अर्ब १३ करोड ८६ लाख २१ हजार रूपैयाँ पुुग्ने छ । चालू आर्थिक वर्षको तेस्रो त्रैमासिक वित्तीय प्रतिवेदनलाई आधार मान्दा हाल मेगा बैंक मात्रको चुक्ता पुँजी १० अर्ब ३८ करोड ८६ लाख २१ हजार चार सय ५० रूपैयाँ रहेको छ भने गण्डकी विकास बैंकको चुक्ता पुँजी दुुई अर्ब ७५ करोड रूपैयाँ पुुग्नेछ ।

प्राप्तिपश्चात् मेगाको कुुल निक्षेप एक खर्ब १७ अर्ब ७१ करोड ६७ लाख आठ हजार रूपैयाँ पुुग्नेछ । चालू आवको तेस्रो त्रैमासिक अपरिष्कृत वित्तीय विवरणअनुुसार मेगाको कुुल निक्षेप ८५ अर्ब सात करोड ४० लाख ७० हजार रूपैयाँ रहेको छ भने गण्डकी विकास बैंकको निक्षेप ३२ अर्ब ६४ करोड २६ लाख ८० हजार रूपैयाँ रहेको छ । यसैगरी प्राप्तिपश्चात् मेगाको कुुल कर्जा भने एक खर्ब छ अर्ब ३९ करोड ५१ लाख ५२ हजार रूपैयाँ पुग्ने छ । हाल मेगाको कर्जा रकम ७८ अर्ब ७४ करोड एक लाख सात हजार रूपैयाँ रहेको छ भने गण्डकीको कुुल कर्जा रकम २७ अर्ब ६५ करोड ५० लाख ४५ हजार रूपैयाँ रहेको छ ।

चालू आवको तेस्रो त्रैमासिक वित्तीय विवरणलाई नै आधार मान्दा प्राप्तिपश्चात् मेगाको खुुद मुनाफा एक अर्ब ८२ करोड छ लाख २७ हजार रूपैयाँ पुुग्नेछ । मेगाले चालू आवको तेस्रो त्रैमासिक अवधिमा एक अर्ब ४५ करोड १० लाख ९० हजार रूपैयाँ खुद मुनाफा आर्जन गरेको छ भने गण्डकी विकास बैंकले ३६ करोड ९५ लाख ३६ हजार रूपैयाँ खुद मुनाफा आर्जन गरेको छ । यसैगरी चालू आवको तेस्रो त्रैमासिक अवधिमा मेगामा एक दशमलव ३२ प्रतिशत कर्जा निष्क्रिय रहेको छ । यस अवधिमा गण्डकी विकास बैंकमा भने शून्य दशमलव ९२ प्रतिशत कर्जा निष्क्रिय रहेको छ ।