पोखरा फाइनान्सले नौ महिनामा कमायो आठ करोड ७८ लाख

काठमाडौं, जेठ ९
पोखरा फाइनान्सले चालू आर्थिक वर्षको तेस्रो त्रैमासिक अवधिमा आठ करोड ७८ लाख ८५ हजार रूपैयाँ खुद मुनाफा आर्जन गरेको छ । गत आवको तेस्र्रो त्रैमासिक अवधिमा फाइनान्सको यस्तो नाफा छ करोड २८ लाख १७ हजार रूपैयाँ रहेको थियो । हाल चुक्ता पुँजी ९१ करोड ७२ लाख ८१ हजार रूपैयाँ रहेको फाइनान्सले चालू आर्थिक वर्षको तेस्रो त्रैमासिक अवधिमा छ अर्ब ९२ करोड ५० लाख ८१ हजार रूपैयाँ निक्षेप संकलन गरी छ अर्ब तीन करोड ५७ लाख ८० हजार रूपैयाँ कर्जा प्रवाह गरेको छ ।

सो अवधिमा २४ करोड ३५ लाख ८९ हजार रूपैयाँ खुद ब्याज आम्दानी गरेको फाइनान्समा शून्य दशमलव ९० प्रतिशत कर्जा निष्क्रिय रहेको छ । गत आवको सोही अवधिमा भने फाइनान्सले पाँच अर्ब ७९ करोड २३ लाख आठ हजार रूपैयाँ निक्षेप संकलन गरी पाँच अर्ब २५ करोड ७२ लाख २१ हजार रूपैयाँ कर्जा प्रवाह गरेको थियो । उक्त अवधिमा १८ करोड ६८ लाख ७९ हजार रूपैयाँ खुद ब्याज आम्दानी गरेको फाइनान्समा एक दशमलव चार प्रतिशत कर्जा निष्क्रिय रहेको थियो ।