एक वर्षमा ११ अर्ब रुपैयाँ बढ्यो बैंकहरूको चुक्ता पुँजी

काठमाडौँ । पछिल्लो एक वर्षमा बैंक तथा वित्तीय संस्थाहरूको चुक्ता पुँजी ११ अर्ब रुपैयाँ बढेको छ । नेपाल राष्ट्र बैंकका अनुसार गत आर्थिक वर्षको साउनसम्म सञ्चालनमा रहेका ५४ वटा बैंक तथा वित्तीय संस्थाहरूको चुक्ता पुँजी कुल चार खर्ब २५ अर्ब १२ करोड रुपैयाँ थियो । चालू आर्थिक वर्षको साउनसम्म बैंकहरूको चुक्ता पुँजी ११ अर्ब २८ करोड ८० लाख रुपैयाँले बढेर चार खर्ब ३६ अर्ब ४० करोड ८० लाख रुपैयाँ पुगेको छ ।

एक वर्षमा वाणिज्य बैंकहरूको चुक्ता पुँजी नौ अर्ब १६ करोड ३० लाख रुपैयाँले बढेको छ । गत आर्थिक वर्षको साउन मसान्तसम्म तीन खर्ब ६९ अर्ब ८५ करोड ७० लाख रुपैयाँ रहेकोमा वाणिज्य बैंकहरूको चुक्ता पुँजी अहिले बढेर तीन खर्ब ७९ अर्ब २० करोड रुपैयाँ पुगेको छ । विकास बैंकहरूको चुक्ता पुँजी गत साउनमा ४२ अर्ब १७ करोड १० लाख रुपैयाँ पुगेको छ । जुन गत आर्थिक वर्षको सोही अवधिको तुलनामा एक अर्ब ९६ करोड ४० लाख रुपैयाँ बढी हो । गत आर्थिक वर्षको सोही अवधिमा विकास बैंकहरूको चुक्ता पुँजी ४० अर्ब २० करोड ७० लाख रुपैयाँ थियो । फाइनान्स कम्पनीहरूको चुक्ता पुँजी गत साउनमा १५ अर्ब २१ करोड ७० लाख रुपैयाँ पुगेको छ । जुन एक वर्षअघिको तुलनामा १६ करोड १० लाख रुपैयाँ बढी हो । एक वर्षअघि साउनमा १५ अर्ब पाँच करोड ६० लाख रुपैयाँ थियो ।

बैंक तथा वित्तीय संस्थाहरूको शाखा संख्या छ हजार चार सय ८६ पुगेको छ । जुन एक वर्षअघि साउनको तुलनामा ४५ वटा बढी हो । गत वर्ष साउनमा कुल शाखा संख्या छ हजार चार सय ४१ थियो । चालू आर्थिक वर्षको साउन मसान्तसम्म बैंकिङ क्षेत्रमा कायम रहेको कुल शाखा संख्यामध्ये वाणिज्य बैंकहरूको पाँच हजार ६३, विकास बैंकहरूको एक हजार एक सय ३५ र फाइनान्स कम्पनीहरूको दुई सय ८८ वटा रहेका छन् । गत आर्थिक वर्षको सोही अवधिमा वाणिज्य बैंकहरूको पाँच हजार २१, विकास बैंकहरूको एक हजार एक सय ३१ र फाइनान्स कम्पनीहरूको दुई सय ८९ वटा शाखाहरू सञ्चालनमा थिए ।

एक वर्षअघि बैंक तथा वित्तीय संस्थाहरू (लघुवित्तसहित)को कुल संख्या एक सय १२ वटा थिए । जसमध्ये वाणिज्य बैंक २०, विकास बैंक १७, फाइनान्स कम्पनी १७, लघुवित्त वित्तीय संस्था ५७ र पूर्वाधार विकास बैंक एउटा थिए । यस वर्ष साउनसम्म यस्तो संख्या घटेर एक सय सातवटामा झरेको छ । जसमध्ये वाणिज्य बैंक २०, विकास बैंक १७, फाइनान्स १७, लघुवित्त वित्तीय संस्था ५२ र पूर्वाधार विकास बैंक एउटा सञ्चालनमा छन् ।

तपाईको प्रतिक्रिया

Login

Label

{} [+]

Name*

Email*

Label

{} [+]

Name*

Email*

0 Comments

Inline Feedbacks

View all comments