Techie IT
×
गृहपृष्ठवित्त पूँजी बजारमर्चेन्ट बैंकरका प्रतिनिधिद्वारा बोर्डका अध्यक्ष ढुंगानासँग भेटवार्ता

मर्चेन्ट बैंकरका प्रतिनिधिद्वारा बोर्डका अध्यक्ष ढुंगानासँग भेटवार्ता


काठमाडौं ।
मर्चेन्ट बैंकर एसोसियसन अफ नेपालका नवनियुक्त पदाधिकारीहरूले नेपाल धितोपत्र बोर्डका अध्यक्ष भीष्मराज ढुंगानासँग शुक्रबार भेट गरेका छन् । संघका अनुसार प्रतिनिधिमण्डलको नेतृत्व मर्चेन्ट बैंकर एसोसियसन अफ नेपालका नवनियुक्त अध्यक्ष मेखबहादुर थापाले गरेका थिए । उक्त अवसरमा बोर्ड अध्यक्ष भीष्मराज ढुंगानाले एसोसियसनका नवनियुक्त पदाधिकारीलाई बधाइ तथा सफल कार्यकालको शुभकामना व्यक्त गरेका छन् ।

भेटमा एसोसियसनका नवनियुक्त अध्यक्ष थापाले धितोपत्र बजार विकास र विस्तारका लागि मर्चेन्ट बैंकरले निभाउनुपर्ने भूमिकाका सन्दर्भमा एसोसियसनले पहलकदमी गर्ने बताउँदै बोर्डको विशेष सहयोगको अपेक्षा गरे । त्यस्तै, एसोसियसनका निवर्तमान अध्यक्ष ध्रुव तिमिल्सिनाले धितोपत्र बजारसम्बन्धी नीतिनिर्माण गर्दा एसोसियसनसँग छलफल गरी बोर्डले उचित स्थान दिएको स्मरण गर्दै आगामी दिनमा समेत यसको निरन्तरता रहने विश्वास व्यक्त गरे ।

भेटका क्रममा बोर्ड अध्यक्ष ढुंगानाले मर्चेन्ट बैंकर थप व्यावसायिक हुनुपर्ने तथा प्रतिस्पर्धात्मक क्षमता अभिवृद्धि गर्नुपर्ने बताए । धितोपत्र बजारमा हालका दिनमा सकारात्मक परिवर्तन भइरहेको बताउँदै उनले यो बजारलाई सूचना प्रविधिमैत्री बनाउनुपर्नेमा जोड दिए । त्यस्तै, उनले बजार सहभागीहरूले लगानीकर्ताको हितलाई मध्यनजर गर्दै व्यवसाय सञ्चालन गर्नुपर्ने बताए । उक्त भेटमा बोर्डका कार्यकारी निर्देशक निरज गिरीले मर्चेन्ट बैंकिङ र बजार विकासका सम्बन्धमा आफ्नो धारणा राखे ।



तपाईको प्रतिक्रिया