महालक्ष्मी विकास बैंकका ऋणीहरूलाई ब्याजमा छुट

काठमाडौं ।
महालक्ष्मी विकास बैंकले ऋणीहरूलाई कर्जाको ब्याजमा छुुट दिएको छ । बैंकले कोभिड १९ का कारण आफ्ना ग्राहकहरूको पेसा, व्यवसाय तथा उद्योगहरूमा पर्नगएको असरलाई मध्यनजर गर्दै ऋणीहरूलाई राहत प्रदान गर्ने उद्देश्यले नेपाल राष्ट्र बैंकबाट जारी भएको पुनरकर्जा कार्यविधिअन्तर्गत आवश्यक प्रबन्ध गरी लघु घरेलु तथा साना उद्यम सञ्चालन गरिरहेका १२ सय ५० भन्दा बढी ऋणीहरूको ७२ करोडभन्दा बढी कर्जाको ब्याज दर घटाई पाँच प्रतिशत कायम गरी सहुलियत प्रदान गरेको हो ।

यसरी पुनर्कर्जा सुविधाका लागि कोभिड १९ को असर परेका उद्यमीहरूका साथै सामाजिक आर्थिक दृष्टिकोणले पिछडिएका विपन्न वर्ग, कृषक तथा महिलाहरूलाई प्राथमिकता दिएको बैंकले जनाएको छ । देशका सहरी तथा ग्रामीण क्षेत्रका विभिन्न स्थानहरूमा एक सय तीनवटा शाखाहरूमार्फत सेवा प्रदान गरिरहेको बैंकमा ग्राहक संख्या पाँच लाखभन्दा बढी रहेको छ ।