एनएमबी बैंकका तीन नयाँ शाखारहित सेवा

काठमाडौं ।
एनएमबी बैंकले एकैदिन तीन शाखारहित सेवा विस्तार गरेको छ । बैंकले वित्तीय पहुँच विस्तार गर्ने उद्देश्यको साथ एकैपटक तीन नयाँ स्थानमा शाखारहित सेवा सञ्चालनमा ल्याएको हो । बैंकले प्रदेश १ मा रौतमाई गाउँपालिका–०६, चिसापानी, उदयपुर, प्रदेश २ मा क्रमशः तिरहुत गाउँपालिका–०४, डिमन, सप्तरी र तिलाठी कोइलाडी गाउँपालिका–८, टोपा सप्तरीमा उक्त सेवा सञ्चालनमा ल्याएको हो । यो समेत बैंकको शाखारहित सेवाको संख्या ३३ पुगेको छ ।

हालको परिवेश र सम्बन्धित सबैको स्वास्थ्यलाई ध्यानमा राख्दै भौतिक दूरीसहित सुरक्षाका सम्भव उपायहरू अवलम्बन गर्दै प्रदेश कार्यालयका कर्मचारी वर्ग र बैंकको केन्द्रीय कार्यालयबाट व्यवस्थापन समितिका सदस्यहरू भने भर्चुअलरूपमै उपस्थित भई उक्त सेवाको शुभारम्भ गरिएको बैंकका प्रदेश २ का प्रमुख राजेश तिम्सिनाले बताए । बैंकले आफ्ना नवीनतम सेवा सुविधाहरू लिएर ग्राहकहरूसम्म पुग्ने क्रम जारी राखेको छ ।

सेवा विस्तार रणनीतिको रूपमा नयाँ शाखारहित सेवाले देशभरिका सर्वसाधारण साथै सबै सेगमेन्टको वित्तीय आवश्यकतालाई पूरा गर्ने प्रयास गर्नुको साथै बैंकको उपस्थितिको आधारलाई मजबुत बनाउने विश्वास गरिएको छ । बैंकले हाल एक सय ८० शाखाहरू, नौवटा विस्तारित काउन्टरहरू, ३३ शाखारहित सेवा, एक सय ३५ एटीएमहरूको मजबुत सञ्जालका साथै चार सयवटा पस मेसिन र १० हजारभन्दा बढी क्यूआर कोडमार्फत उच्चस्तरीय बैंकिङ सेवा प्रदान गर्दै आएको छ ।