सिद्धार्थ बैंकद्वारा गोंगबु क्षेत्रका होटल व्यवसायीहरूलाई क्यूआर कोड हस्तान्तरण

काठमाडौँ  ।
सिद्धार्थ बैंक लिमिटेडले नगदरहित कारोबारलाई प्रोत्साहन गर्ने उद्देश्यले शुक्रबार गोंगबु शाखा प्राङ्गणमा एक समारोह आयोजना गरी गोंगबु क्षेत्रका नेपाली होटल व्यवसायी संघसँग आबद्ध ५० होटल व्यवसायीहरूलाई क्यूआर कोड हस्तान्तरण गरेको छ । बैंकका प्रमुख कार्यकारी अधिकृत शम्भुनाथ गौतम, गोंगबु शाखा प्रबन्धक मिनबहादुर चौलागाई, नेपाली होटल व्यवसायी संघका महासचिव गणेश ढकाल साथै होटल व्यवसायी सदस्यहरूको उपस्थिति रहेको उक्त कार्यक्रममा प्रमुख कार्यकारी अधिकृत गौतमले श्रमिक गेष्ट हाउसमा क्यूआर कोडमार्फत भुक्तानी गरी कार्यक्रम सम्पन्न गरेका हुन् ।

उक्त क्यूआर कोड सेवा सुरु भएसँगै ग्राहकहरूले नेपाली होटल व्यवसायी संघअन्तर्गतमा रहेका होटल तथा लजहरूमा आफ्नो मोबाइल बैंकिङ एप प्रयोग गरी होटल सञ्चालकलाई सिधै खातामा भुक्तानी गर्न सक्नेछन् । बैंकले हाललाई ५० होटल व्यवसायीहरूलाई क्यूआर कोड हस्तान्तरण गरेको छ र आगामी दिनहरूमा होटल संख्या थप गर्ने कार्यलाई निरन्तरता दिँदै जाने योजना बैंकको रहेको छ । नगदरहित कारोबार प्रवर्द्धन तथा साक्षरता विस्तार गर्ने उद्देश्यले आयोजित उक्त कार्यक्रममार्फत साना तथा मझौला उद्यमीहरू डिजिटल बैंकिङतर्फ प्रोत्साहन हुने विश्वास बैंकले लिएको छ ।