लक्ष्मी बैंकको अगुवगाइमा माथिल्लो पिलुवा खोला–३ जलविद्युत् आयोजनामा ६५ करोड कर्जा

काठमाडौं ।
माबिलुङ्ग इनर्जी लिमिटेडको संखुवासभा जिल्लाको साबिकको सिद्धकाली र मावादिन गाविसमा अवस्थित पिलुवा र सिखुवा खोलामा निर्माण गर्ने चार दशमलव ९५ मेगावाटको माथिल्लो पिलुवा खोला–३ जलविद्युत् आयोजनाको लागि लक्ष्मी बैंकको अगुवाइमा माछापुच्छ्रे बैंक समेत जम्मा दुुईवटा वाणिज्य बैंकहरूले सहवित्तीयरकणअन्तर्गत कर्जा लगानी गर्ने सम्झौता भएको छ । बैंकका अनुसार सोमबार कर्जा सम्झौता भएको उक्त आयोजनाको निर्माण लागत जम्मा रुपैयाँ ९३ करोड ७० लाख रहेको छ ।

माबिलुङ्ग इनर्जी लि. र नेपाल विद्युत् प्राधिकरणबीच विद्युत् खरिदसम्बन्धी सम्झौता मिति २०७५ साल चैत्र १२ गते भएको र उक्त आयोजना निर्माणको लागि ऊर्जा मन्त्रालयबाट मिति २०७७ साल श्रावण ९ गतेका दिन विद्युत् उत्पादन अनुमति प्राप्त गरेको छ । माबिलुङ्ग इनर्जीलाई एसियन लाइफ इन्स्योरेन्स कम्पनी, गुहेश्वरी मर्चेन्ट बैंकिङ एन्ड फाइनान्सलगायत अन्य व्यक्तिहरूले प्रवद्र्धन गरेका छन् । कम्पनीको अध्यक्ष पदमा भने राजेशलाल श्रेष्ठ रहेका छन् ।

बैंकहरूले आयोजना लागतको ७० प्रतिशत अर्थात् ६५ करोड ५९ लाख र बाँकी ३० प्रतिशत कम्पनीको स्व. लगानी रहनेछ । उक्त आयोजनाको लागि लक्ष्मी बैंकले ३९ करोड ९९ लाख र माछापुच्छ्रे बैंकले २५ करोड ६० लाख रुपैयाँ कर्जा लगानी गर्ने छ । उत्पादन क्षमता चार दशमलव ९५ मेगावाट रहेको माबिलुङ्ग इनर्जीले झण्डै २८ दशमलव ४१७ गेगावाट आवर विद्युत् वार्षिकरूपमा उत्पादन गरी राष्ट्रिय प्रसारण लाइनमा जडान गर्ने लक्ष्य राखेको छ र यो आयोजना फेबु्रअरी २०२२ मा सञ्चालनमा आउनेछ ।

नेपाल विद्युत् प्राधिकरणको आर्थिक वर्ष २०१९/२० को समीक्षा प्रतिवेदनअनुसार सो आर्थिक वर्षमा स्वतन्त्र ऊर्जा उत्पादकहरूले जम्मा १५ वटा नयाँ आयोजनामार्फत संयुक्तरूपमा एक सय ३५ दशलव ३९ मेगावाट विद्युत् उत्पादन गरीराष्ट्रिय प्रसारण लाइनमा जोडिएको छ । साथै उक्त १५ वटा आयोजनाहरूलाई समेत समावेश गर्दा जम्मा ९८ वटा आयोजनाहरू सञ्चालनमा आएका छन् र तिनीहरूको संयुक्त उत्पादन छ सय ९६ दशमलव १७ मेगावाट रहेको छ ।