सिंगटी हाइड्रो इनर्जीले २९ करोड रुपैयाँको सेयर जारी गर्ने

काठमाडौँ ।
सिंगटी हाइड्रोपावर कम्पनीले २९ करोड रुपैयाँबराबरको साधारण सेयर जारी गर्ने भएको छ । कम्पनीले यही चैत छ गतेबाट २९ करोड रुपैयाँबराबरको साधारण सेयरको बिक्री खुला गर्न लागेको हो । कम्पनीका अनुसार एक सय रुपैयाँ अंकित मूल्य कायम रहने गरी २९ करोड रुपैयाँबराबरको २९ लाख कित्ता साधारण सेयरको बिक्री खुला गर्न लागिएको हो ।

सेयर निष्काशन तथा बिक्री प्रबन्धक मेगा क्यापिटल लिमिटेड रहेको कम्पनीको साधारण सेयरको बिक्री कार्य छिटोमा यही चैत १० गते र ढिलोमा चैत्र २० गते बन्द हुुनेछ । बिक्री गरिने कुल सेयरमध्येमा कम्पनीमा कार्यरत कर्मचारीहरूको लागि दुई प्रतिशत अर्थात् ५८ हजार कित्ता, सामूहिक लगानी कोषको लागि पाँच प्रतिशत अर्थात् एक लाख ४५ हजार कित्ता र बाँकी २६ लाख ९७ हजार कित्ता सेयर भने सर्वसाधारणलाई बिक्री गरिने कम्पनीले जानकारी दिएको छ । कम्पनीका अनुसार खरिदकर्ताहरूले न्यूनतम १० देखि अधिकतम दुई लाख कित्तासम्मको सेयर खरिद लागि आवेदन दिन सक्नेछन् ।