एभरेष्ट बैंकद्वारा नयाँ वर्ष २०७८ को क्यालेन्डर सार्वजनिक

काठमाडौं ।
एभरेष्ट बैंकले नयाँ वर्ष २०७८ को क्यालेन्डर सार्वजनिक गरेको छ । बैंकले पर्यटन विभाग, प्रर्दशनीमार्गमा आयोजित समारोहका बीचमा नयाँ वर्ष २०७८ को कर्पोरेट क्यालेन्डर सार्वजनिक गरेको हो । लामो समयदेखि बैंकले नेपालको संस्कृति र पर्यटनसम्बन्धी विभिन्न विषयवस्तुहरूलाई समाहित गर्दै आफ्नो कर्पोरेट क्यालेन्डर बनाउँदै आएको छ ।

सगरमाथाको १२ फरक मुहारहरू विषयवस्तु राखेर तयार पारिएको बैंकको क्यालेन्डर २०७८ पर्यटन विभागका महानिर्देशक रुद्रसिंह तामाङ र बैंकका प्रमुख कार्यकारी अधिकृत जीके नेगी, नेपाल पर्वतारोहण संघका कार्यकारी सदस्य तथा बैंकका ब्रान्ड फेस मिङमा डेभिड शेर्पाले संयुक्तरूपमा अनावरण गरेका छन् ।

सो कार्यक्रममा डा. सन्धीर कुमार नायव महाप्रबन्धक, एभरेष्ट बैंकलगायत पर्यटन विभाग तथा बैंकका अन्य उच्च अधिकारीहरू पनि सामेल थिए । सगरमाथाको नयाँ गौरवमय उचाइ आठ हजार आठ सय ४८ दशमलव ८६ मिटरलाई मध्यजर गर्दै यसको चर्चा बढाउन बैंकले सगरमाथाको १२ फरक मुहारहरूजस्तो फरक विषयवस्तुलाई चित्रण गरेको हो जसले नेपालको माउन्टेन पर्यटनलाई अझ बढावा दिने विस्वास बैंकको छ ।