एनएमबी बैंकको ३५ प्रतिशत लाभांश पारित

काठमाडौं, पुस २७
एनएमबी बैंकको लाभांश पारित भएको छ । बैंकको बिहीबार सम्पन्न भएको २४औँं वार्षिक साधारणसभाले गत आर्थिक वर्षको खुद मुनाफाबाट आफ्ना सेयरधनीहरुलाई ३५ प्रतिशत लाभांश वितरण गर्ने प्रस्ताव पारित गरेको हो । वार्षिक साधारणसभाद्धारा पारित भएको कुल लाभांशमा २१ प्रतिशत बोनस सेयर र बोनस सेयरमा लाग्ने कर सहित १४ प्रतिशत नगद लाभांश रहेको छ । सभाले संस्थापक सेयरधनीहरुको तर्फबाट प्रतिनिधित्व गर्ने गरी तीन जना संस्थापकहरु निर्विरोध निर्वाचित गरेको छ । यसरी निर्वाचित हुनेहरुमा पवन कुमार गोल्यान, एफएमओको तर्फबाट निको पिल र कर्मचारी सञ्चय कोषको तर्फबाट संस्थापक सेयरधनी राजेन्द्र काफ्ले रहेका छन् ।

गत असोज ११ गतेबाट ओम डेभलपमेन्ट बैंकलाई प्राप्ति गरी एकिकृत कारोबार सञ्चालन गरेको एनएमबीको चुक्ता पुँजी हाल ११ अर्ब ५२ करोड ९७ लाख ४१ हजार छ सय रुपैयाँ रहेको छ । गत आवको खुद मुनाफाबाट २१ प्रतिशत बोनस सेयर वितरण गरेपश्चात् बैंकको चुक्ता पुँजी १३ अर्ब ९५ करोड नौ लाख ८७ हजार रुपैयाँ पुगेको जानकारी बैंकले दिएको छ । हाल बैंकले एक सय ६३वटा शाखा, पाँचवटा एक्स्टेन्सन काउन्टर तथा एक सय २८वटा एटीएममार्फत सेवा प्रदान गर्दै आएको छ ।