एनएमबी लघुवित्तको प्रतिसेयर आम्दानी ४६ रुपैयाँ ६० पैसा

काठमाडौं, माघ १२
एनएमबि लघुवित्तले चालू आर्थिक वर्षको दोस्रो त्रैमाससम्ममा चार करोड ९० लाख रुपैया खुद नाफा कमाएको वित्तीय विवरण सार्वजानिक गरेको छ । गत आर्थिक वर्षको यसै अवधिसम्ममा एक करोड तीन लाख रुपैयाँ मात्र खुद नाफा कमाएको संस्थाले चालू आर्थिक वर्षको सोही अवधिमा तीन करोड ८७ लाख रुपैयाँले बढाएको हो । लघुवित्तको प्रतिसेयर आम्दानी ४६ रुपैयाँ ६० पैसा पुगेको छ । जुन आम्दानी गत वर्षको यसै अवधिको तुलनामा ३३ रुपैयाँ ८६ पैसाले वृद्धि भएको छ ।

लघुवित्तको खुद ब्याज आम्दानी र सञ्चालननाफा बढ्नुका साथै खराब कर्जा उठाउन सफल भएका कारण खुद नाफा बढेको हो । यस अवधिमा लघुवित्तले १३ करोड ६७ लाख रुपैयाँ खुद ब्याज आम्दानी गरेको छ भने चार करोड ८१ लाख रुपैयाँ सञ्चालन नाफा गरेको छ । समीक्षा अवधिमा लघुवित्तले एक अर्ब ३१ करोड रुपैयाँ निक्षेप संकलन र दुई अर्ब ४७ करोड रुपैयाँबराबरको सापटीमार्फत तीन अर्ब ४७ करोड रुपैयाँ कर्जा लगानी गरेको छ ।

संस्थाको चुक्ता पुँजी १६ करोड २० लाख रुपैयाँबाट बढेर २१ करोड ६ लाख रुपैयाँ पुगेको छ भने जगेडा कोष नौ करोड ७० लाख रुपैयाँबाट बढेर १७ करोड ५८ लाख रुपैयाँ पुगेको छ । एनएमबि बैंकको आठ करोड २६ लाख रुपैयाँ लगानी रहेको संस्थाले यस अवधिमा खराब कर्जा दुई दशमलव ८९ प्रतिशतबाट दुई दशमलव ८२ प्रतिशतमा झार्न सफल भएको छ । लघुवित्तको प्रतिसेयर नेटवर्थ एक सय ८३ रुपैयाँ ५२ पैसा र मूल्य आम्दानी अनुपात १७ दशमलव १७ गुणा रहेको छ ।