सिद्धार्थ बैंकको १५ प्रतिशत लाभांश पारित

काठमाडौं । सिद्धार्थ बैंक लिमिटेडको २०औँ वार्षिक साधारणसभा शुक्रबार बैंकका अध्यक्ष मनोज कुमार केडियाको अध्यक्षतामा सम्पन्न भएको छ ।

सभाले बैंकको चुक्ता पुँजी १० अर्ब ९६ करोड २२ लाख ९९ हजार एक सय ९५ रुपैयाँमध्येबाट १४ दशमलव २५ प्रतिशतबराबरको एक अर्ब ५६ करोड २१ लाख २७ हजार छ सय ३६ रुपैयाँबराबरको बोनस सेयर तथा शून्य दशमलव ७५ प्रतिशत अर्थात् आठ करोड २२ लाख १७ हजार दुई सय ४४ रुपैयाँबराबरको नगद लाभांश (बोनस सेयर कर प्रयोजनका लागि मात्र) प्रदान गर्नेलगायतका प्रस्तावहरू पारित गरेको छ ।

विसं २०५९ सालमा स्थापना भएदेखिनै सिद्धार्थ बैंक ग्राहकवर्गको चाहनाबमोजिम सेवा प्रदान गर्न प्रतिबद्ध रहँदै आएको छ । ग्राहकका लागि नवीनतम प्रविधिमैत्री सेवा विस्तार गर्दै १९ वर्षको सफल यात्रा पूरा गरेको बैंक सम्पूर्ण सेवाग्राहीहरूलाई उत्कृष्ट सेवा प्रदान गर्न सधैँ प्रयत्नरत रहेको बैंकले जनाएको छ ।

बढीभन्दा बढी नेपालीमाझ बैंकिङ पहुँच पु-याउने उद्देश्यका साथ बैंकले हालसम्म एक सय ८९ वटा शाखा, दुई सय आठवटा एटीएम, एक सय १४ शाखारहित बैंकिङ, एक हजार आठ सय ९० वटा पीओएसमार्फत देशभरि नै आफ्नो सञ्जाल विस्तार गरेको छ ।