सगरमाथा इन्स्योरेन्सको २५औँ साधारणसभा

काठमाडौं । सगरमाथा इन्स्योरेन्स कम्पनी लि.को २५औं वार्षिक साधारणसभा सम्पन्न भएको छ । कम्पनीले अध्यक्ष रामकृष्ण मानन्धरको अध्यक्षतामा बुधबार काठमाडौंमा साधारणसभा गरेको हो । साधारणसभामा वार्षिक प्रतिवेदन पेश गर्दै अध्यक्ष मानन्धरले विगतका वर्षहरुमा कोरोनाको कारण भौतिक रुपमा उपस्थित भई साधारणसभा गर्न नसकेको र यस वर्ष भने सबै सेयरधनीहरु समेत उपस्थित भएर भेटघाट गरी साधारणसभा सम्पन्न गर्न पाएकोमा खुसी व्यक्त गरेका थिए ।

साधारणसभामा कम्पनीले आर्थिक वर्ष २०७६/०७७ को तुलनामा आर्थिक वर्ष २०७७/०७८ मा १६.०५ प्रतिशतले व्यवसाय वृद्धि गर्दै दुई अर्ब ६१ करोड बराबरीमा शुल्क आर्जन गरी एनएफआरएस अनुसार ४४ करोड ७४ लाख २५ हजार खुद मुनाफा आर्जन गरेको जानकारी दिइएको थियो ।

साधारणसभामा इन्स्योरेन्सका प्रमुख कार्यकारी अधिकृत चंकी क्षेत्रीले कम्पनीले आर्थिक वर्ष २०७७/०७८ को तुलनामा चालू आर्थिक वर्ष २०७८/०७९ को चैत मसान्तसम्ममा १०.८६ प्रतिशतले वृद्धि गरी एक अर्ब १६ करोड ७९ लाख बराबरको कुल दाबी भुक्तानी गरेको बताएका थिए । त्यसैगरी आर्थिक वर्ष २०७७/०७८ को तुलनामा चालू आव २०७८/०७९ को चैत मसान्तसम्ममा २१.९७ प्रतिशतले व्यवसाय वृद्धि गरी दुई अर्ब ४३ करोड आर्जन गरेको सीईओ क्षेत्रीले बताए ।

साधारणसभाले हाल कायम रहेको चुक्ता पुँजीको २० प्रतिशत बोनस सेयर र सोमा लाग्ने कर समायोजनार्थ १.०५२६३ प्रतिशतले हुन आउने नगद लाभांश वितरणको प्रस्ताव, कम्पनीको वार्षिक प्रतिवेदनसहित वासलात, नाफा नोक्सान हिसाब र सोसँग सम्बन्धित सम्पूर्ण अनुसूचीहरु पारित गरेको छ ।