सप्तकोशी डेभलपमेन्ट बैंकको बैंकिङ सेवा अब आइतबार पनि खुल्ला हुने

काठमाडौं । नेपाल सरकारले २०७९ साल जेठ १ गतेदेखि लागू हुने गरी हप्तामा शनिबार र आइतबार गरी दुई दिन विदा दिने निर्णय गरेसँगै मेनरोड विराटनगरमा कर्पोरेट कार्यालय रहेको सप्तकोशी डेभलपमेन्ट बैंक लिमिटेडले ग्राहकहरुको सुविधालाई ध्यानमा राख्दै आइतबार पनि बैंकिङ सेवा प्रदान गर्ने निर्णय गरेको छ । यसअन्तर्गत हाल बैंकले प्रदेश नं. १ म रहेका आफ्ना ३५ शाखाहरुमध्ये १३ शाखाहरु (मेनरोड विराटनगर, टंकीसुनवरी, इलाम, रंगेली, उर्लाबारी, विराटचोक, बिर्तामोड, इटहरी, धरान, धनकुटा, वसन्तपुर, दमक र पुष्पलाल चोक)बाट यही जेठ १ गतेदेखि नै सेवा प्रदान गर्नेछ र आगामी दिनमा बजारको आवश्यक र ग्राहकको मागबमोजिम आइतबार सञ्चालन हुने शाखा संख्या बढाउँदै लैजाने नीति बैंकले लिएको छ ।

आइतबार सञ्चालन हुने शाखाहरुमा बैंकले बिहान १० बजेदेखि अपराह्न २ बजेसम्म सेवा प्रदान गर्नेछ । यसरी सरकारले हप्तामा दुईदिन सार्वजनिक विदा दिने निर्णय गरेपश्चात् आइतबार पनि बैंकिङ सेवा दिने सप्तकोशी डेभलपमेन्ट बैंक नेपालका बैंकहरुमा नै पहिलो बैंक रहेको जानकारी समेत बैंकले दिएको छ । बैंकको यस थप सेवाले ग्राहकवर्गमा सुविधा पुग्न जाने र आइतबार सञ्चालन हुने बजारलाई केही हदसम्म भए पनि बैंकिङ आवश्यकताको परिपूर्ति हुने र बैंकको यस प्रकारको सेवाले बैंक र जनताबीचको सम्बन्ध र विश्वास अझ प्रगाढ हुंदै जाने तथा व्यवसाय विस्तारमा सहयोगी हुने विश्वास बैंकले लिएको छ ।

बैंकले गा्रहक सुविधा विस्तार गर्दै लाने क्रममा चाँडै नेपाल, भारत र भुटानमा समेत सञ्चालन हुने तथा नेपालभर सञ्चालनमा ग्राहकलाई कुनै पनि शुल्क नलाग्ने गरि वितरण समेत निःशुल्करुपमा डेविट कार्ड जारी गर्दै छ भने थप सुविधाका साथ दुई बचत योजना (शून्य मौज्दातमै खाता खोली डेबिट कार्ड, स्मार्ट बैंकिङ्ग समेत निःशुल्क प्राप्त गर्न सकिने एक र अर्को ग्राहक बैंकमा गई लाइन नबसी विशेष सेवा प्राप्त गर्नसक्नेलगायत थप विशेष सेवासहितको भीआईपी बचत खाता गरी दुई बचत खाताहरु) समेत सञ्चालन गर्नलागेको बैंकले जानकारी दिएको छ ।