स्थानीय तहको निर्वाचनको नेप्सेमा नकारात्मक प्रभाव

काठमाडौं । स्थानीय तहको निर्वाचनको प्रभाव सेयर बजारमा नकारात्मक देखिएको छ । स्थानीय तहको निर्वाचन हुनुभन्दा एकहप्ता अघिसम्म सेयर परिसुचक एवं कारोबार रकम दुबै नै उकालो लागेको थियो । तर बैशाख ३० गते स्थानीय तहको निर्वाचन सम्पन्न भएपछि पहिलो दिन अर्थात आज जेठ तीन गतेबाट खुलेको सेयर बजार उच्च अंकले ओरालो लागेको छ ।

आज सेयर बजार परिसुचक ८४ दशमलव नौं अंकले ओरालो लागेर २२ सय ६५ दशमलव ५२ बिन्दुमा झरेको छ । क बर्गका कम्पनीहरुको कारोबार मापन गर्ने सेन्सिटिभ इन्डेक्स पनि १५ दशमलव २८ अंकले ओरालो लागेर चार सय ३८ दशमलव ६८ बिन्दुमा झरेको छ । आज १३ वटा उपसमुह अन्तर्गत दुई सय २१ वटा कम्पनीहरुको सेयर कारोबार भएका छन् । जसबाट ३३ हजार छ सय १० पटकको कारोबारमा ३५ लाख ९५ हजार पाँच सय ६८ कित्ता सेयर खरिद बिक्री भएको छ । सोही खरिद बिक्रीको आधारमा आज कुल सेयर कारोबार रकम एक अर्ब ६४ करोड ४० लाख ५० हजार दुई सय ३९ रुपैंयाँ पुगेको छ ।

नेपाल स्टक एक्सचेन्ज लिमिटेड (नेप्से) मा आज १३ वटा उपसमुहहरुको सेयर कारोबार भएको छ । जसमध्ये सबै उपसमुहहरुको सुचक ओरालो लाग्दा सेयर बजार परिसुचक पुरै रातो देखिएको छ ।